Samvel Babayan: "Bugungi o'yinni 70 foiz o'z nazoratimizda o'tkazdik"

O'yin haqida

- Birinchi navbatda bugungi g'alaba bilan muxlislarimizni tabriklashni istardim. Derbida muhim g'alabani qo'lga kiritdik. Qadrli "Navbahor" muxlislari, Sizlarni jamoamizning bugungi g'alabasi bilan tabriklaymiz. Yigitlarga rahmat, ular guruh bosqichida 100 foizlik natija bilan navbatdagi bosqich masalasini hal etishdi. Oldinda bizni muhim o'yinlar kutib turibdi, bosqichma-bosqich davom etamiz. Bugungi o'yinni 70 foiz o'z nazoratimizda o'tkazdik.

- Jamoa 7 o'yindan buyon bir hujumchi bilan harakat qilayapti. Rejangizda o'yinni 2 ta hujumchi bilan boshlash varianti ham bormi?

- Taktika bo'yicha Siz bilan men gaplashmayman. Men konkret aytganman, bizda 10 xil o'yin uslubi bor. Bizda istalgan vaqtda hujumga qo'shilib ketadigan, hujumchiga aylana oladigan futbolchilar bor. Nominal bir hujumchi maydonda bo'lsa, kerak vaqtida 2 ta hujumchi uslubiga ham o'tishimiz mumkin. Bu savol bugungi kunda dolzarb emas. Biz hujumkor o'yin namoyish etayapmiz.

- "Neftchi" bosh murabbiyi Ilhom Mo'minjonov Superliga birinchi turida "Navbahor" o'ynashni istagani haqida gapirgandi. Bu bo'yicha sizning fikringiz qanday?

- Kim bilan o'ynashning farqi yo'q. Faqat "Navbahor" va "Neftchi" o'rtasidagi o'yinlarida har doim kuchli intriga bo'lgan. Bu jamoalar o'rtasidagi o'yinlarga muxlislarning qiziqishi juda yuqori.

- Elguja Grigalashvilining xolati qanday?

- Unda hammasi yaxshi, keyingi o'yinga qadar tayyor bo'ladi.

- Jamoada ikkita bir xil tarkib shakllangan. Nega rotaciyalarni amalga oshirmayapsiz?

- Savol uchun rahmat. Bu men kutgan savol. Hozirgi tarkibda 7-8 nafar yangi futbolchilar bor. Ular jamoaga moslashib ketishlari uchun vaqt zarur bo'ladi. Kubok uchrashuvlarida ham bizga Superliga klublari to'g'ri kelib qoldi. Zaxiramizda juda yaxshi futbolchilar bor, har bir chiziqda etarlicha raqobat shakllangan. Biz uchun natija juda muhim. Vaqti kelib barcha futbolchilarga imkon beramiz.