Rustam Ashurmatov: "Har qanday terma jamoa bilan o'ynay olamiz"

"Kayfiyat alo darajada, jamoadoshlarimni ko'rganimdan so'ng yanada ko'tarildi. Jismoniy holatimni zo'r deya olmayman. Sababi avvalgi yig'indan so'ng Toshkentda qoldim. "Bunyodkor", bir marotaba "Qo'qon-1912" jamoasi mashg'ulotida ishtirok etdim. Ayni paytda holatim yaxshi. O'yinlarga qadar yanada yaxshiroq holatga kirib olishga harakat qilaman. 

Koreya chempionatida jamoamning qayd etgan natijasidan qoniqdim deya olaman. Mavsumni oltinchi o'rinda yakunladik, avval jamoamiz bu o'ringa chiqmagan edi. Klubdagi futbolchilar, murabbiylar va rahbarlarning kayfiyati alo degan bo'lardim. Keyingi mavsumga qadar yanada yaxshiroq tayyorgarlik ko'ramiz. 

Arab jamoalari bilan o'ynash har doim qiyin bo'lgan. Har qanday terma jamoa bilan o'ynay olamiz. Futbolchilar ham bunga ishonadi. Faqat o'z o'yinimizni ko'rsatsak muammo bo'lmaydi deb o'ylayman. Koreyada mavsum yakunlangani sababli yig'indan so'ng Toshkentda qolaman. Bir muddat dam olaman va klub bilan hozirlikni davom ettiraman. Klub bilan shartnomam fevral oyida yakunlanadi, shundan keyingina takliflarni ko'rib chiqaman",- deydi Rustam Ashurmatov.