Ro'ziqul Berdiev: "Futbolchilarim "So'g'diyona"ni "bir oyoqda" yutamiz deb o'ylashdi shekilli"

"O'yin haqiqiy kubok bahsi bo'ldi. Natija uchun ikkala jamoa kurashdi. Bilamiz Ulug'bek Baqoev boshchiligidagi jamoa doim oxirigacha kurashadi.

Bugun ikkala jamoa ham standart vaziyatlardan unumli foydalanishga urinishini bilardik. Etibor qilsangiz to'rtta gol ham standart vaziyatdan urildi. Bahs qaysidir jamoa ustunligida o'tdi deb bo'lmaydi, biz ham, mezbonlar ham g'alaba uchun birdek harakat qildi.

Birinchi taymdagi o'yinimizdan juda ham norozi bo'ldim. Buni tanaffus vaqtida ham aytdim. Futbolchilarim "So'g'diyona"ni "bir oyoqda" yutamiz deb o'ylashdi shekilli. Biroq kurashmasak yaxshi natija bo'lmasligini uqtirdim.

Ikkinchi taymdagi bazi o'zgarishlar o'yinimizni kuchaytirdi. Buni gol urib amalda isbotladik. Norxonovning yuqorida juda yaxshi harakat qilishini futbolchilarga har qancha tushuntirmaylik, baribir o'z vaziyatidan foydalanib ketdi.

Jamoamizda uch nafar darvozabon bor. Nematov va Ergashev turli terma jamoalarda o'yinlar o'tkazishgan. Azamat Soyibov ularga nisbatan kamroq o'yin amaliyotiga ega edi. SHu bois bugun Azamatga imkoniyat berdik.

Guruhdan chiqish uchun "Bunyodkor", "So'g'diyona" va "Nasaf" teng imkoniyatga ega. Balki uchala klub ham keyingi bosqichga chiqar, eng yaxshi ikkita uchinchi o'rin ham chiqadiku.

O'yin paytida ikkala jamoa azolari bir birlariga keskin o'ynashdi, ammo bahsdan so'ng buni unutishdi.

Hakamlarga bugun etibor ham qilmadim (kuladi)," - deydi Ro'ziqul Berdiev.