Ro'ziqul Berdiev: “Bugun muxlislar 12- o'yinchimizga aylanishdi”

-Bugungi o'yinimizda bizni Qashqadaryoning har bir burchagidan muxlislar kelib bizni qo'llab-quvvatlab, haqiqiy manoda 12-o'yinchimizga aylanishdi. Bizni qo'llab-quvvatlagan barcha o'z minatdorchiligimni bildiraman. Bugungi g'alaba barchamizniki. O'ylaymizki, bugun ishqibozlar stadionni xursand holda tark etishdi. Futbolchilarimiz ham o'zlarini har tomonlama ko'rsatishdi va muhim g'alabaga erishdik,- deya gap boshladi Ro'ziqul Sadullaevich. – O'yinga keladigan bo'lsak, biz “Paxtakor”ning o'yinlarini chuqur taxlil qilgan edik. Har bir chiziqdagi o'yinchisini mukammal o'rgangan edik. “Paxtakor” kuchli tarkibga ega jamoa. Har qanday maydonda, har qanday raqibga qarshi o'z o'yinini ko'rsata oladi. SHu bois bugungi o'yindagi vazifalarmizdan biri- mehmonlarni o'z o'yinlarini namoyish etishga yo'l qo'ymaslik edi. Yigitlar talabimizni yaxshi bajarishdi. Maydonning har bir qarichida keskin kurash kechdi. Va shuni hisobiga biz haqli ravishda final yo'llanmasini qo'lga kiritdik, deb o'ylayman. Bu adashmasam to'rtinchi bor finalga chiqishimiz. Avvalgi finallarning barchasida mag'lub bo'lganmiz. Lekin bu gal shu qora ananaga chek qo'yib, muxlislarni xursand etish niyatidamiz. Finalda “Bunyodkor”ga qarshi to'p tepamiz. Raqibimiz har tomonlama shakllangan, tarkib borasida yurtimizdagi eng etakchi jamoa hisoblanadi. SHunga qaramay o'yin bobida “Bunyodkor”ga raqobatlasha olamiz.

-Ikkinchi bo'lim avvalida etakchi futbolchilaringizdan biri Gadoev jiddiy jarohat olib maydonni tark etdi. Uning ahvoli qanday?
-Hozir uning holati haqida menga xabar berishdi. SHohruhning oyog'ining kichik panjasiga jiddiy jarohat olgan. Kamida ikki-uch hafta maydonga tusholmasligi mumkin.