Rossiya sport vaziri mamlakat futbol chempionatini terma jamoaga yordam berishni xohlamaslikda aybladi

Bu haqda R-Sport xabar bermoqda.

Xabar berishlaricha, mamlakat chempionatining so'nggi turini nisbatan erta muddatga surish haqida futbol bo'yicha Rossiya milliy terma jamoasi bosh murabbiyi, italiyalik Fabio Kapello, terma jamoani JCH-2014 bahslariga nisbatan yaxshiroq tayyorlash maqsadida so'ragan. Italiyalik murabbiy chempionatning so'nggi turini 18 maydan 11 mayga, mamlakat Kubogi finalini esa 8 maydan 17 mayga ko'chirishni so'ragan. Biroq 27 yanvar kuni Premer-liga ushbu iltimosni rad etdi.

Men buni aqlga sig'maydigan holat deb hisoblayman. Men klublarni hurmat qilaman, biroq mamlakat jahon chempionatida ishtirok etadi. Unga tayyorgarlik ko'rish uchun imkon berish kerak!, – dedi Mutko seshanba kuni. Vazirning so'zlariga ko'ra, u Rossiya futbol ittifoqi prezidenti Nikolay Tolstix va Premer-liga prezidenti Sergey Pryadkin bilan suhbatlashgan. Mutkoning fikricha, ular Kapelloning iltimosini bajarish yo'lini topishadi.

28 yanvar kuni Rossiya chempionatining so'nggi turini boshqa sanaga ko'chirish masalasi Rossiya futbol ittifoqi ijroiya qo'mitasi majlisida muhokama qilinadi.

Rossiya terma jamoasi 2002 yildan beri birinchi marta futbol bo'yicha jahon chempionati bahslarida ishtirok etadi. Braziliyada bo'lib o'tadigan musobaqada ruslar Janubiy Koreya, Belgiya va Jazoir jamoalariga qarshi bahs olib borishadi.

Qayd etish joiz, 24 yanvar kuni Rossiya futbol ittifoqi mamlakat terma jamoasini JCH-2014 final bosqichiga olib chiqqan italiyalik murabbiy Fabio Kapello bilan yangi, 2018 yilgi jahon chempionati oxirigacha mo'ljallangan shartnoma imzolagan edi. Ushbu mundial Rossiyada bo'lib o'tadi.