“Rektor Kubogi”da futbolimiz yulduzlari bellashdi

Salkam ikki hafta davom etgan kichik turnirda 26ta jamoa olimpiya tizimi bo'yicha g'oliblik uchun kurash olib bordi. Bilasiz, bu institutda juda ko'plab sportchilar, xususan, futbolchilar tahsil olib kelishadi. Ularning orasida yoshlardan tortib, faxriylarini ham uchratishingiz mumkin. “Rektor Kubogi”da o'zbek futboli yulduzlari to'p surdi. Xususan, musobaqaning final uchrashuvida bir qator yulduzlarimiz jam bo'lishdi. 

O'yinlarning har bir bo'limi 20 daqiqadan iborat bo'ldi. Uchrashuvlar institutdagi tabiiy maydonda o'tkazildi. Musobaqaning final uchrashuvi anchagina qiziqarli kechdi. O'tgan yili ham finalgacha etib kelgan Bobomurodov murabbiyligidagi 3-kurs talabalari bu safar ham ketma-ket qo'lga kiritgan g'alabalari bilan hal qiluvchi o'yinda maydonga chiqishdi. Muxlislarga yaxshi tanish Alibobo Rahmatullaev, Ahror Umarjonov, Mirjamol Qosimov, Sanjar Quvvatov to'p surgan jamoa final uchrashuvining birinchi bo'limida raqibidan ustunlik qilgan holda “ukalari” darvozasini ikki marta ishg'ol qilishdi. Bu gollar ularni xotirjam bo'lishlariga etarli bo'ldi. Natijada ustunlik 2-kurs talabalarining qo'liga o'tdi. Ravshan Xursanov va Akrom Komilov kabi yoshlar ajoyib kombinaciyalari bilan Sanjar Quvvatov darvozasiga xavf solishdi. Hujumlarning birida Xursanov o'zi ishtirok etgan kombinaciyani gol bilan yakunladi. Qolgan daqiqalarda ham ularda gol urish imkoniyati bo'lgandi, biroq tarkibda nisbatan yulduzlari kam bo'lgan 2-kurs talabalari ko'plab vaziyatlardan tajribasizlik sababli foydalana olishmadi. Bu 3-kurs talabalarining “Rektor Kubogi”ni qo'lga kiritishiga etarli bo'ldi. SHu tariqa o'tgan finalda yutqazib qo'ygan jamoa bu safar chempionlikni nishonlashdi.  

Final o'yini yakunlangach g'oliblarni taqdirlash marosimi bo'lib o'tdi. Unda so'zga chiqqan institut rektori Isroilov SHoakram Xolmatovich hazil tariqasi aynan shu kabi musobaqalar tufayli murabbiy-futbolchi talabalarni institutda ko'rishlarini takidlab, ularga tegishli medallar, diplom va ko'chma kubokni topshirdi. 

Aytish kerak, turli yoshdagi terma jamoalarda to'p suradigan futbolchilarning barchasi o'zlari tahsil olayotgan kurs obro'si uchun musobaqada maydonga tushganligiga guvoh bo'ldik. Vaholanki, musobaqa Respublika yoki shahar miqiyosida emas, balki institut talabalari o'rtasida o'tkazildi. Institutda tahsil olayotgan barcha futbol yulduzlari “Rektor Kubogi”ni beetibor qoldirgani yo'q. Xususan, Maksimilyan Fomin, Doston Abdurahmonov, Zafar Safoev, Sergey Rekun, Abdumajid Toirov, Zabihillo O'rinboev, Abdumavlon Abdujalilov, Akmal Tursunboev, Sarvar Otaboev va Igor Sergeev o'z jamoasining g'alabasi uchun maydonga chiqishdi. 

Yuqorida taqdirlash marosimida institut rektori ham so'zga chiqqani aytib o'tgandik. SHoakram Xolmatovich g'oliblarni taqdirlar ekan, ulardan xursand ekanligiga alohida urg'u berib, o'yinlarda astoydil harakat qilishganini, musobaqaga parda ostidan qaramaganliklarini takidladi. Hatto hazillashib, bu futbolchilar oliy liga bahslarida ham stadionga kelib, maydonga tushib, o'ynab ketaverishlarini, lekin “Rektor Kubogi”da uchrashuvlarga jiddiy tayyogarlik ko'rganliklarini, kerak bo'lsa, mashg'ulotlarda qatnashganlarini eslatib o'tdi.  

“REKTOR KUBOGI” – 2015

FINAL

2-KURS – 3-KURS – 1:2 (0:2)

Bosh hakam: M.Nurmatov.

2-kurs: Odamboy Ergashev, Akrom Komilov, Ravshan Xursanov, Abbos O'lmasbekov, Nuriddin Umarov, Bahrom Boev.

Zaxiradagilar: Ravshan Rajabov, Tohir Alimurodov.

Bosh murabbiy: A.To'laganov.

3-kurs: Sanjar Quvvatov, Alibobo Rahmatullaev, Mirjamol Qosimov, Ahror Umarjonov, U.Boqiev, D.Tolibjonov.

Zaxiradagilar: O.Ikromov, U.Abdullaev, A.Mahsumov.

Bosh murabbiy: B.Bobomurodov.

Gollar: Ravshan Xursanov – Alibobo Rahmatullaev (2ta).