Ravshan Haydarov: "Qozog'iston bilan o'yinlarda ikki xil tarkibdan foydalandik. O'rinboev mushaklaridan jarohat oldi"

- Bugungi va o'tgan o'yin haqidagi fikrlaringiz...

- Bugungi o'yin bilan yig'inimiz yakuniga etdi. O'ylaymanki, ushbu yig'in 2005-2006 yilgi bolalarga, yani olimpiyachilarga bag'ishlandi. Yigitlar, ayniqsa, birinchi marta termaga kelgan bolalar sinovdan o'tib olishdi. Biz uchun axborotga ega bo'lish muhim edi. Savollarga javob oldik deb o'ylayman. Hali o'yinlarimizni tahlil qilamiz, shakllanish jarayonidamiz. Uchrashuvlarda ikki xil tarkibdan foydalandik. Hali kamchiliklar talaygina, ishlaydigan jihatlarimiz ko'p. Bularning barchasini ko'rib oldik. 

- Ushbu yig'indan qay darajada ko'nglingiz to'ldi? 

- Ko'nglim to'lgan joyi shundaki, bu yigitlarni shu erda yig'ib, ko'rib olganimizda bo'ldi deb ayta olaman. Aksariyat futbolchilar uchun bu birinchi chaqiruv edi. O'zini ko'rsata olmagan futbolchilar ham bo'ldi, bu ham kerak. Bu bolalarga motivaciya bag'ishlaydi. O'z klubiga qaytganida, o'z ustida yanada ko'proq ishlaydi va chaqiruv olishga urinishadi. Futbolchilarning hozirgi kundagi saviyasini ko'rib oldik. Oldingi jamoalar bilan taqqoslash imkonimiz bor. Bitta yig'inda hammasi birdan bo'lmaydi. O'ylaymanki, sekin-asta o'yinni shakllantirib boramiz. Umuman olganda, natija bor, bu xursand qiladi. Biroq kamchiliklarni ham to'g'rilay bilishimiz lozim.

- Muhammadali O'rinboev birinchi o'yindagi jarohat tufayli allaqachon klubi ixtiyoriga – Belgiyaga uchib ketibdi. Bu jarohat jiddiy emasmi?

- Mushaklaridan jarohat oldi. O'zimiz tekriraylik desak, "Antverpen" klubi vakillari uning qaytishini va o'zlari tibbiy tekshiruvdan o'tkazishlarini xohlashdi. Shu bois, uni Belgiyaga jo'natib yubordik.

- Keyingi yil yanvar oyida Saudiya Arabistonida U-23 Osiyo Kubogi bor, dekabrda esa FIFA kunlari yo'q. Dekabrda U-23 terma jamoasi bilan yig'in o'tkazasizmi? Bu paytda Superliga va Pro liga tugaydi, futbolchilar esa dam olishi keark. Shu vaziyat sizni qanchalik o'ylantiryapti?

- Albatta o'ylantirmoqda. Lekin ilojimiz qancha. Futbolchilarga ozroq dam beramiz, yig'in dekabr o'rtalariga rejalashtirilgan. Bu paytda legionerlarni jalb etish mushkul. O'zimizdagi jamoalar futbolchilarini yig'ib turamiz. Dekabr oxirida o'rtoqlik o'yinlari tashkil etiladi. Bu borada ish ketmoqda. Yanvar oyida biz musobaqaga kirishamiz. Hammasi rejalashtirilgan. Ko'p o'yin amaliyotiga ega va og'ir yuklamali futbolchilar bilan individual ishlaymiz. Bu hisobga olinadi. Hammasini hisoblab borib, dekabrda bir xulosaga kelamiz. Jismoniy tayyorgarlikni qisqa vaqt bo'lsa-da, mavjud vaziyatga qarab ish tutamiz.

- U-23 saralashida aynan U-23 terma jamoasi qatnashdi. Osiyo Kubogida ham xuddi o'sha jamoa qatnashadimi yoki rahbariyat va o'zingizda 2 yosh kichiklar bilan borishimiz kerak, degan fikr bormi? 

- Bor. Har xil fikrlar mavjud. Murabbiylar kengashida bu masalani ko'rib chiqamiz. Hozirgi tarkib azolari Qozog'istondan 1 yosh katta edi. Shu o'yinchilarni pishitib boryapmiz. Noyabr oyida ham bir turnir bor. Ehtimol, aralash tarkibni o'ynatib ko'ramiz. Shuni muhokamasi ketmoqda. Niyatimiz — urg'uni 2005-2006 yilgi futbolchilarga qaratish.