Rauf Inileev: "Iordaniyadagi o'yin biz uchun juda muhim"

Rauf Talgatovich bilan muloqot davomida bir qancha savollarga javob oldik. Va albatta, fursatdan foydalanib Inileevdan bugun bo'lib o'tadigan Iordaniya – O'zbekiston uchrashuvi borasidagi fikrlarini ham so'radik. Quyida aynan bugungi o'yinga atalgan savol-javoblarni etiboringizga havola etamiz.

-   Rauf Talgatovich, bugun milliy terma jamoamiz safarda Iordaniyaga qarshi maydonga tushadi. Mutaxassis sifatida bu o'yindan nima kutyapsiz?
-   Guruh uchrashuvlaridan farqli o'laroq pley-off bahslari ikkita o'yindan iborat va bunda yutqazgan jamoa musobaqadan chiqib ketadi. Sizga aytsam, Iordaniyada bo'lib o'tadigan birinchi o'yin biz uchun juda muhim, chunki dastlabki bellashuvda o'z maqsadiga erisha olmagan jamoaga javob bellashuvida yanada qiyin bo'ladi. Har ikkala jamoa oldiga g'alaba qozonib, keyingi bosqichga yo'l olish vazifasi qo'yilgani haqida matbuotda tez-tez o'qiyapmiz. SHunday ekan, bugun birinchi navbatda chiroyli o'yin va albatta ijobiy natija kutyapman.
 
-   Imkoniyatlar borasida nima deya olasiz?
-   Menimcha, ikkala uchrashuv natijasiga ko'ra keyingi bosqichga chiqish imkoniyati bizda ko'proq. CHunki statistik ko'rsatkichlar bo'yicha Iordaniyadan ustunmiz, guruhda uchinchi o'rinni olganimiz bilan ulardan ko'proq ochko jamg'ardik. Qolaversa, o'yinchilarimizning saviyasini ham ularnikiga nisbatan baland deb bilaman. Uchinchidan esa bizdagi legionerlar soni ularga nisbatan ko'proq va bizning legionerlar o'z klublarida zaxirada qolib ketmasdan muntazam maydonga tushishmoqda.
 
-   Demak, tarkibimiz kuchli deb hisoblaysiz?
-   Albatta. Buni isbotlab o'tirish shart bo'lmasa kerak. Yana bir gap, Baqoev, Kapadze, Jeparov singari futbolchilar uchun jahon chempionatiga chiqish bu safar oxirgi imkoniyat bo'lishi mumkin. O'ylaymanki, ular buni yaxshi tushunib turishibdi va maqsadga erishish uchun oxirigacha kurashishlari turgan gap.

-   Iordaniyadan farqli o'laroq biz o'rtoqlik uchrashuvi o'tkazmadik. Bu xalaqit berishi mumkinmi?
-   14 avgust kuni bo'lib o'tishi lozim bo'lgan o'rtoqlik uchrashuvi nima sababdan qoldirilganini bilmayman. Ammo terma jamoamiz bosh murabbiyi o'rtoqlik o'yinisiz tayyorgarlik ko'rishni lozim topdi va bu uning qarori. To'g'risini aytsam, meni nazorat bellashuvi o'tkazilmagani unchalik xavotirga solayotgani yo'q. Bundan ham muhim masala shuki, bizda eng asosiy o'yinchilardan biri Ignatiy Nesterov jarohat olib qoldi. Bundan tashqari, oxirgi o'yinlarda kam gol urayotganimiz ham tashvishlantiryapti. Qatar bilan uydagi o'yinni hisobga olmaganda, boshqa bellashuvlarda bittadan ko'p to'p kirita olmadik. Oxirgi o'yinlarni tahlil qilib chiqsak, vaziyatlardan foydalanish borasidagi ko'rsatkichlar ancha past ekanligi oydinlashadi.

-   Sizningcha, terma jamoa darvozasini kim qo'riqlagani maqul?
-   Termaga chaqirilgan uchala darvozabon ham bir xil saviyada. To'g'ri, Eldor Suyunovda o'yin amaliyoti kam, biroq unda darvozabon uchun kerakli xislatlar borligi ko'rinib turibdi. Nazarimda, Zuhurovga biroz xarakter etishmayotgandek. Lobanov esa ko'pincha kutilmagan xatolarga yo'l qo'yishi mumkin. To'g'risini aytsam, menga ko'proq Suyunov varianti maqul kelyapti.
 
Xayrulla Xoliqov va Nodirxo'ja Yuldashev suhbatlashishdi