Rasmiy xabar: Aleksandr Mochinov - "Buxoro" bosh murabbiyi

O'tgan mavsumda bosh murabbiy Edgar Gessning istefosidan so'ng, Seid Seidov bosh murabbiy vazifasini mavsum so'nggiga qadar bajarib keldi. Seidov legioner murabbiy hisoblanadi. PFL reglamentiga binoan xorijlik, bosh murabbiy vazifasida ishlaydigan mutaxasis PRO licenziyasiga ega bo'lishi kerak. Seid Yusupovichda esa ushbu licenziya yo'q.

Bo'sh qolgan bosh murabbiy lavozimiga ko'plab nomzodlar ko'rib chiqildi. Jumladan O'zbekistonning mashhur murabbiyi Yuriy Sarkisyan nomzodlar orasida bor edi,lekin Yuriy Vazgenovich hozir ishlab turgan ish joyini o'zgartirmaslikni maqul ko'rdi.

Barcha nomzodlar bilan olib borilgan muzokaralardan so'ng, viloyat rahbariyati “PRO”  licenziyasiga ega Mochinov Aleksandr Vladimirovich nomzodini tanladi. O'tgan mavsum ushbu murabbiy “Bunyodkor” jamoasida katta murabiy lavozimida ishlagan edi.

Demak,rasman, Aleksandr Mochinov “Buxoro” PFK bosh murabbiyi etib tayinlandi!

Amaldagi murabbiylar shtabidan o'rin olgan mutaxasislarning shartnomalari shu yilning 31 dekabr sanasida yakuniga etadi.Bundan keyin jamoa murabbiylar shtabida o'zgarishlar bo'lishi kutilmoqda. Viloyat rahbari tomonidan bosh murabbiy, murabbiylar shtabini o'zi xohlagan mutaxasislar bilan to'ldirishi kerakligi aytib o'tilgan.

“Buxoro” jamoasi mavsumoldi yig'inni 15 dekabr kuni o'z qarorgohida boshlashi tasdiqlandi. Jamoani bugunga kelib rasman biron-bir futbolchi tark etgani yo'q.Futbolchilarning shartnomalari 31 dekabr kuni o'z nihoyasiga etadi. Barcha selekciya ishlari ham boshlab yuborilgan.

Biz “Buxoro” jamoasiga yaqinlashib kelayotgan yangi 2015 yilgi mavsumda omadlar tilab qolamiz.