"Qo'qon-1912" yangi mavsum oldidan Turkiyada yig'in o'tkazadi

Bosh murabbiy Rustam Abdullaev yangi mavsumga tayyorgarlik rejasini tuzib chiqdi. Unga ko'ra jamoa to'rt bosqichdan iborat yig'inni o'taydi.

Yani futbolchilar uzoq davom etgan tatildan 20 dekabr kuni qaytadi. Qo'qonda o'tadigan ilk bosqich yig'inida o'yinchilarning tiklanish jarayoniga etibor qaratiladi.

Yangi yil bayrami munosabati bilan futbolchilarga 29 dekabr kuni qisqa muddatdi dam beriladi.

4 yanvardan esa yig'inning ikkinchi bosqichi start oladi. Rejaga ko'ra jamoa 25 yanvarga qadar o'z qarorgohida shug'ullanadi. SHundan so'ng yana futbolchilarga biroz dam berib, 27 yanvardan yig'in Toshkentga ko'chadi. Poytaxtda 11 fevralga qadar mashg'ulot o'tkazish ko'zda tutilgan.

Darvoqe, qo'qonliklar yangi mavsum oldidan tayyorgarlik jarayonida xorijga chiqishni ham rejalashtirgan. Unga ko'ra fevralning 15 sanasidan to 24 sanasiga qadar Turkiyada yig'in o'tkaziladi.

Xorijdan qaytib kelgingach, futbolchilarga yana dam berib, 27 fevraldan Qo'qonda chempionat startiga qadar shug'ullanish rejadan o'rin olgan.

Tabiiyki ushbu yig'inlar davomida "Qo'qon-1912" sinov-nazorat uchrashuvlarida ham maydonga tushadi. Bosh murabbiy futbolchilarni aynan uchrashuvlar orqali ham ko'rikdan o'tkazishni maqsad qilgan. Lekin hozircha sparring jamoalarning nomi malum emas. Bu haqda keyinroq yana xabar beramiz.