“Qizilqum” muxlislar klubi ishqibozlarni Qiziltepaga taklif etadi

Oliy liga vakili “Buxoro” futbolchilari bilan kechadigan mazkur o'rtoqlik o'yini har ikki jamoa kelishuvi bilan Navoiy viloyatining Qiziltepa tumanidagi “Do'stlik” stadionida 8 mart kuni bo'lib o'tadi. Uchrashuv soat 11.00 da boshlanadi.

Xabaringiz bor, o'tgan mavsumda o'z maydonidagi o'yinlarda eng ko'p tomoshabin to'plash borasida “Qizilqum” jamoasi peshqadamlik qildi. Navoiy shahrida o'tkazilgan o'n uch uchrashuvni bevosita stadionning o'zidan 158324 nafar muxlis kuzatib bordi. Bu o'tgan mavsumda oliy liga jamoalari o'rtasidagi eng yuqori ko'rsatkich sifatida etirof qilindi.

Jamoa muxlislar klubining bildirishicha, bu anana bu yil ham davom etadi. “Qizilqum” jamoasi rahbariyati va Muxlislar klubi tashabbusi bilan 8 mart kuni Qiziltepada o'tadigan o'yinda konchilarni qo'llab-quvvatlash istagida bo'lgan ishqibozlar uchun Navoiy shahridan maxsus avtobuslar tashkil etiladi. Avtobus 8 mart kuni soat 9.00 da Navoiy shahridagi “So'g'diyona” stadioni yonidan Qiziltepa tomon yo'lga chiqadi.

Murojaat uchun telefon - +998913333773.