"Qizilqum": Futbolchilarimiz hasharda

Bobodehqon qadoq qo'li bilan yaratilgan paxta hosilini yig'ishtirib olish ishlari qizg'in davom etyati.

Umumxalq hasharida qatnashishni o'ziga sharaf deb bilgan “Qizilqum” PFK jamoasi ham kuni kecha paxtakorlarga yordamga oshiqdi. Futbolchi yigitlar bilan bir qatorda “Qizilqum - Guli” jamoasi qizlari ham klub rahbariyati tashabbusini qo'llab-quvvatlashdi.

Jamoamiz azolari Navoiy tumanidagi paxtazorlarda dehqonlarimizga kamarbasta bo'ldilar. Hasharda ishtirok etgan yuz nafardan ziyod “Qizilqum” futbolchi yigit-qizlari kun davomida 2180 kilogramm paxta terib, yurtimiz xirmoniga o'zlarining munosib ulushlarini qo'shdi.

- O'zbekistonda besh yildan beri to'p surayotgan bo'lsam, ilk marotaba bunday hasharda ishtirok etishim, - deydi gruziyalik legioner Georgiy Kvesieshvili. -  Egnimizda ko'rkam va bejirim libos kiyishni barchamiz xohlaymiz. Ammo bu kiyimlarimizni qanchalik katta zahmat evaziga yaratilishini hasharda qatnashib, yurakdan his qildim. Paxtakorlarning mashaqqatli yumushlarini ko'rib, hosilni yig'ib terib olishga ozmi-ko'pmi hissa qo'shganimdan juda xursandman.