PFLga yana qatiyatlik etishmayapti!

SHuning uchun ham otaning talab va istaklariga bo'ysunish talab etiladi. CHunki u otada. Har xolda kattalar shunday deb o'rgatishadi. O'zbek futbolida Professional futbol ligasi tashkiloti ish boshlaganida guyoki ko'pchilik mana endi futbolimizda sezilarli oldinga qadam tashlash kuzatiladi. CHunki PFL o'z nomi bilan PFLdir qabilidagi fikrlar ilgari surilgandi. Ammo mana bir necha yillarki ushbu tashkilotning faoliyati OAVda ko'pincha tanqid ostiga olib kelinmoqda. Tanqid kelajak mevasi deyishadi, agarda u haqiqatdan ham to'g'ri tanqid bo'lsa. PFLga aslida nima etishmayotgani haqida ustoz hamkasb akalarimiz juda ko'p yozishdi. Yurtimizda yangi chempionat boshlanganiga ham mana bir oydan oshiq vaqt o'tdi. Ko'rib turibmizki, PFL bu yil ham o'sha o'sha saviyada ishlamoqda. Avvalgi yillarga nisbatan aytarli jiddiy o'zgarish yoki yangilik yaratilmadi. Boz ustiga PFLga qatiyatlik etishmayapti.

KUBOKDA BIRINCHI LIGA JAMOALARI TAQDIRGA TAN BERDIMI?
Mavzuimizning asosiy qismi bu PFLga qatiyatlik etishmyotganiga qaratilgan. Xususan  O'zbekiston Kubogining 1/16 final bosqichida oliy liga klublariga qarshi o'ynashi kerak bo'lgan ayrim birinchi liga klublari taqdirga tan berganmi? CHunki o'z maydonida oliy liga peshqadami “Paxtakor”ni qabul qilishi kerak bo'lgan “Xorazm” bu o'yinni Xivada emas (“Xorazm” bu yil raqiblarini Urganchda emas, Xivada qabul qilmoqda – I.R) balki Toshkentda o'tkazishni PFLga murojaat etib so'ragan. Nima uchun bunday qarorga kelingani ochig'i bizga qorong'u. Bu borada shaxsiy fikrimizni bildiradigan bo'lsak, naxotki klub rahbarlari xorazmlik ashaddiy ishqibozlarni manfaatidan ko'ra o'zlarini o'ylagan bo'lsa. Futbol muxlislar uchun deb doimo aytib kelingan. Xo'sh, unga amal qilinyaptimi?

Haqiqatdan ham futbol shinavandalari uchun o'ynalyaptimi yoki shunchaki rasmiyatchilik chunki o'tkazilyaptimi? “Xorazm” – “Paxtakor” o'yinini ko'rishni bizningcha butun Xorazm axli intiqlik bilan kutayotgan bir paytda uchrashuvni Toshkentga ko'chirish to'g'rimikin? Axir voxaliklar yilda bir marotaba bo'lsa ham, asli xorazmlik bo'lgan va bugungi kunda “Paxtakor”ning asosiy figuralaridan biri bo'lmish Jamshid Iskanderovni o'z ko'zlari bilan Xivadagi stadionda ko'rishni istaganlar qancha? Esimda “Xorazm” ilgari oliy ligada o'ynaganda “Paxtakor”ga qarshi o'yinlarda stadion tribunasi tomoshabinlar bilan liq to'lardi. Mana shunday qarama-qarshiliklarni xorazmliklar sog'inib qolishgani aniq. Tahminimizcha “Xorazm” bo'lajak o'yinni poytaxtda o'tkazishni so'raganini sababi bu maydonning yaxshi emasligi bilan bog'liq bo'lsa kerak. Yana kim biladi deysiz.

Nima bo'lgan taqdirda ham uchrashuv Xivada o'tkazilsa maqsadga muvofiq bo'lardi. Bu bilan “Xorazm” taqdirga tan berib, uyda yutqazdik nimayu, safarda yutqazdik nima degandek tuyulmoqda. To'g'ri tushuning birinchi liga klublari Kubokda oliy ligaga jamoalariga qarshi o'yinlardan oldin mag'lubiyatni oldindan tan olayotgandek go'yo. Yo'qsa ular bu borada shov-shuv uyg'otish maqsadida ham jiddiy kurashgan bo'lardi. Albatta bugungi “Xorazm”  va “Paxtakor”ni bir-biri bilan taqqoslab bo'lmaydi. Oliy liga vakili urganchliklardan har tomonlama ustun. Lekin bu mag'lubiyatni oldindan tan olish degani emas. CHunki futbolda hamma narsa bo'lishi mumkin.

Mana shunday xolat “Bunyodkor-2” – “Nasaf” qarama-qarshligida ham takrorlandi. Yaqinda PFL rasmiy saytida chiqqan xabarga ko'ra Toshkentda o'tkazilishi kerak bo'lgan mazkur bahs ham Qarshiga ko'chirilgan. Tarkibi asosan 1994 yil va undan kichik yoshdagi futbolchilardan iborat bo'lgan “Bunyodkor-2” Kubok bahslarini dastlab Toshkentning “Obod” jamoasiga qarshi boshlab 7:2 hisobida g'alabaga erishgandi. Keyinchalik taqvimga ko'ra yosh “qaldirg'ochlar” 1/16 final bosqichida “Nasaf”ga qarshi o'ynashi malum bo'ldi. 19 aprel kuni “ajdarlar” poytaxtga kelishi lozim bo'lgan bir paytda PFL bu bahsni ham ikkala jamoaning o'zaro kelishuviga ko'ra Qarshida o'tkazilishini malum qildi. Toshkentda maydon bilan bog'liq muammo yo'qligini inobatga olsak, bunga nima majbur etganini ochig'i tushunmadik.

BIRINCHI LIGADA O'YINLAR TUSHLIK PAYTIDA HAM O'TKAZILMOQDA BUNDAN KIM YUTMOQDA?

PFL bu yilgi birinchi liga o'yinlariga ham jiddiy etibor qaratmayotgandek. CHunki hammasi o'sha o'sha. Aslida ushbu liga ishtirokchilaridan bir narsa talab etish ham qiyin. CHunki deryali hammasi chempionatda arang qatnashayotgandek. Professionallik o'tish uchun qilinishi lozim bo'lgan jihatlarni klub rahbarlariga aytsangiz sizni eshitgisi ham kelmaydi. “Maqsadimiz kuchli sakkiztaklikka kirish” yoki “Mahalliy o'yinchilarimizni oliy liga klublariga tayyorlab berish” qabilidagi gaplarni hammasi yodlab olgan. Hammada shu gap. 2-3ta klubdan tashqari qolganlarning asl maqsadi ham hokimyat tomonidan ajratilgan pullarni yil davomida turli usullar orqali sarf etishdir. Farhod Magometov bu yil birinchi liganing ayrim klublarida taftish komissiya o'tkazilishini aytgandi. Bizningcha bunga liga ishtirokchilari tayyor emas. Sababi ularning ko'plarida baza va stadion yo'q. Garchi o'z stadioniga ega bo'lmasada, PFL ularni chempionatda ishtirok etishiga ruhsat bermoqda. SHuning uchun ham klublarimiz masuliyatsiz bo'lib ketmoqda. CHempionat boshlanishini oz vaqt qolganida bekor yurgan  futbolchilarni o'z tarkibiga qo'shib olib, PFLga ishonchnoma xati bilan murojaat etib musobaqada ishtirok etish ayrim jamoalarni odat tusiga aylangan.
O'z stadioniga ega bo'lmagan klublar (aslida ularni klub deb atash ham to'g'ri bo'lmasa kerak) ijara asosida o'zga stadionlardan foydalanmoqda.

Aksariyat xollarda mana shu xolat kishini biroz o'yga solmoqda. Misol uchun 3-turdan o'rin olgan “NBU-Osiyo” – “Kosonsoy” bahsi “Jar”dagi mashg'ulotlar maydonida o'tkazildi. Uchrashuv 12:00da boshlanishini eshitib xayron qoldik. To'g'ri, PFL reglamenti bo'yicha 12:00 va undan keyin o'tkazilsa bo'laveradi. Lekin bu o'yinni aynan tushlik paytiga qo'yilgani to'g'rimikin? “NBU-Osiyo”ni muxlislari yo'q shekilli, shuning uchun ham ularga qaysi vaqtda o'tkazilishini farqi bo'lmasa kerak. Bu borada klub rasmiylari bilan suhbatlashganimizda shu kuni “Jar”dagi asosiy maydonda “Bunyodkor” – “Lokomotiv” uchrashuvi o'tkazilishi munosabati bilan shunday qarorga kelinganini aytishdi. Kosonsoyliklarning 12:00ga biroz kechikib kelgani natijasida uchrashuv 12:30larda boshlangan. SHunga qaramay mehmonlar uchrashuvda 2:0 hisobida g'alaba qozongan.

Keyinchalik birinchi ligada yana bir o'yin 12:00da o'tkazildi. “Lokomotiv-BFK” – “Istiqlol” uchrashuvi “Do'stlik” stadionida tushlik paytida o'tkazilgan. Kun cho'qqiga chiqqan paytda futbolchilarning ham 90 daqiqa maydonda chopishi oson bo'lmasa kerak har xolda.

Toshkentda o'zi oliy liga o'yinlariga muxlislar kirmayotgan bir paytda birinchi liga uchrashuvlariga kim har kirardi deb o'ylanib qolasan kishi?!

SHuningdek birinchi ligadagi stadionlar haqida shuni ham aytib o'tish kerakki, ayrim stadionlarda o'yin natijasini ko'rsatib turuvchi tablo yo'q. O'yinga biroz kechikib kelgan muxlis uchrashuvda qanday natija qayd etilayotganini boshqalardan so'rab bilishga harakat qiladi.

Ko'ryapsizmi klublar o'zaro kelishuvga erishib xohlagan vaqt o'yinni o'tkazishmoqda. Nahotki professional futbol ligasi tashkilotidagi rahbarlar bunga yo'l qo'yib berishayotgan bo'lsa? Futbol muxlislar uchun shiori qaerga ketmoqda?

O'yinlarni xuddi bayramdek o'tkazib muxlislarga xursandchilik ulashish uchun o'z ishiga sidqidildan yondoshadigan klublar judayam kam! Boshqalardan o'rganib ularni amalda joriy etishdan uyalish kerak emas. SHunday ekan hech qachon bundan uyalmang hurmatli birinchi liga klubi rahbarlari!

Islombek Rustambekov.