“Paxtakor” - “Nasaf”. Prevyu

Bu yilgi kubok bahslarining har ikkala uchrashuvida ham  “sherlar”ni taslim qilgan “ajdarlar”, endi uchinchi marta kurashga kirishadi. Bu safar mazkur jamoalar chempionat bahsida o'zaro kuch sinashadi.

Har ikkala jamoa ishqibozlari kelayotgan dushanba kuni, shubhasiz qiziqarli uchrashuvga guvoh bo'lishadi.

“Paxtakor” va “Nasaf” endi o'zaro 41-uchrashuvda maydonga tushadilar.

O'zaro uchrashuvlarga oid faktlar

Mazkur jamoalarning o'zaro uchrashuvlari tarixiga nazar tashlaydigan bo'lsak, shu paytgacha ular 40 marta o'zaro kuch sinashganlar. SHulardan 22tasida “sherlar” g'olib bo'lishgan, 10ta uchrashuvda g'olib aniqlanmagan. Qolgan 8 uchrashuvda “ajdarlar” g'alaba nashidasini surishgan.  To'plar nisbati esa 57-31ni tashkil qilmoqda. Ustunlik “Paxtakor” tomonida.

Jamoalar o'zaro uchrashuvlarda bir xil, yani 4:0 - yirik hisobdagi g'alabalarini nishonlashgan.

Toshkentda o'tkazilgan uchrashuvlar

Ushbu jamoalar Toshkentda 20 marta chempionat uchrashuvlarida tuqnash kelishgan. SHularning 16tasida “Paxtakor jamoasi g'alaba qozongan, “Nasaf” esa 1 marta, 2001 yili g'alabaga erishgan, qolgan 3 uchrashuvda murosa ko'chasi tanlangan. “Paxtakor” so'nggi bor o'z maydonida “Nasaf”ni 2015 yili  mag'lub etgan.

Quyida bo'lajak  uchrashuv rasmiylari bilan tanishing:

O'zPFL 14-tur

“Paxtakor” (Toshkent) – “Nasaf” (Qarshi)

19.06.2017. “Paxtakor” markaziy stadioni. 19:00da

Bosh hakam: Valentin Kovalenko (Toshkent)

Qanot hakamlari: Abduhamidullo Rasulov, Jamshid Saidov (Toshkent)

Zaxira hakami: Aleksandr Lupashko (Toshkent)

Nazoratchi: Farxod Abdullaev (Toshkent)

O'zPFL vakili: Axrol Inoyatov.

Uchrashuv bosh hakami Valentin Kovalenko bu yilgi chempionatda jamoamiz ishtirokidagi  o'yinni boshqarmagan.