"Paxtakor-79"ni xotirlab: Sirojiddin Bozorov

Sirojiddin Bozorov 1961 yil Samarqand viloyati Narpay tumanida tug'ilgan. Bolaligidan futbol bilan shug'ullanishi natijasida 1972 yil Respublika sport-internatiga o'qishga kirdi. CHidamlilik, epchillik va maqsadga intilishi, futbolni juda sevishi bilan alohida ko'rinib turardi. Birinchi ustozi Vadim Yatchenko unga millionlar o'yini sirlarini o'rgatgan. Ikki yildan so'ng O'zbekiston yoshlar terma jamoasi safiga chaqirigan. Internatning 10-sinfida o'qib yurish chog'ida u "Paxtakor"ning o'rinbosarlar jamoasi tarkibida o'ynagan.

1978 yil sobiq Ittifoq yoshlar Spartakiadasida O'zbekiston yoshlar termasi tarkibida kumush medalga sazovor bo'lgan.

Sirojiddin aviahalokatda dunyodan ko'z yumgan o'n etti futbolchi orasida eng kichigi edi. 10 avgust kuni u 18 yoshga to'lgandi. Fojiadan ikki kun oldin Sirojiddin institutga kirish uchun imtihonlardan birini muvaffaqiyati topshirib chiqqan. Minskka yo'l olishni xohlamagani haqida ko'pchilik eslaydi. Imtihon sababli o'rinbosarlar bilan uchmagani, asosiy tarkibda jarohat ko'pligi tufayli u asosiy tarkibda tushishi mumkinligi to'g'risida bir necha odam eslab o'tgan. Onasini ko'rib kelish uchun Samarqandga otlanishni xohlagani, pasportini Qibraydagi bazada qoldirib ketgani haqida aytilgan. U "Paxtakor" asosiy tarkibida maydonga tushib ulgurmasdan 18 yoshida halok bo'lgan.

Sirojiddin Bozorov Samarqand viloyati, Narpay tumanida o'zi tug'ilib o'sgan Tortuvli qishlog'i qabristoniga dafn etilgan.