O'zbekistonlik mutaxassislar “Fenerbahche” faoliyati bilan yaqindan tanishdi

Turk futbol klublari faoliyati bilan yaqindan tanishish maqsadida tashkil etilayotgan mazkur seminar doirasida vakillarimiz Turkiyaning grand klublaridan biri – “Fenerbahche”ga tashrif buyurishdi. Mazkur klubning infratuzilmasi bilan yaqindan tanishtirish, klubning ish jarayoni haqida batafsil malumot berish uchun “Fenerbahche”ning sport direktori Mario Branko, klubning selekciya ishlariga masul O'kan O'zkan, muxlislar bilan ishlash va chiptalar savdosini yo'lga qo'yish uchun javobgar Tezjan SHayli, shuningdek, marketing va tijoriy masalalar bo'yicha Egemen Ergyuden o'z taqdimotlarini namoyish etishdi.

Juda qiziqarli va savol-javobga boy tarzda kechgan suhbatlar davomida o'zbek mutaxassislari turk klubining o'ziga xos ish uslubi haqida to'liq malumot olishga muvaffaq bo'lishdi. Ayniqsa, “Fenerbahche”ning skauting xizmati ish jarayoni, o'yinchilarning rivojlanish dinamikasini tahlil qilish uslubi va yosh futbolchilarni tarbiyalab, so'ngra yanada katta ligalarga transfer qilish mexanizmi bilan tanishuv ishtirokchilarda katta qiziqish uyg'otdi.