O'zbekiston va Xitoy futbol associaciyasi mutasaddilari ishtirokida uchrashuv o'tkazildi

"Uning avvalida O'FA birinchi vice-prezidenti Ravshan Ermatov ikki mamlakat o'rtasida futbolni rivojlantirish borasidagi harakatlar yangi bosqichga chiqishiga umid bildirdi. Xitoy ko'p jabhada dunyoda o'z o'rniga ega ekanligi, xususan, mamlakat futboli ham katta natijalarga erishayotganini qayd etdi. 

O'z navbatida, xitoylik mutaxassislar O'zbekiston va Xitoy o'rtasida futbolning barcha yo'nalishida samarali hamkorlik istiqbollariga to'xtalishdi. O'zbekistonning Osiyo futbolidagi mavqeini etirof etishdi. Tomonlar o'zaro tajriba almashish masalalarini atroflicha ko'rib chiqdilar. Xususan, turli terma jamoalar o'rtasida o'rtoqlik uchrashuvlarini tashkillashtirish, xalqaro musobaqalarga O'zbekiston terma jamoalarini jalb etish, Milliy, Olimpiya va ayollar terma jamoalari o'rtasida turnirlarni yo'lga qo'yish bo'yicha takliflar bildirildi. 

Futbol infratuzilmasi, akademiyalar faoliyati va terma jamoalar bazasini tashkil etishda Xitoy tajribasini o'rganish, hakamlar uchun tajriba almashish dasturlarini joriy etish masalalariga to'xtalib o'tildi. Malumki, Xitoyda dunyoning futboli eng rivojlangan mamlakatlaridan mutaxassislar faoliyat olib borishmoqda. Bu borada yurtimiz vakillari ham o'zaro tajriba almashish dasturlarida ishtirok etib, o'z malakasini oshirish istiqboli yuzasidan fikr almashildi. 

Xanchjouda bo'lib o'tadigan Osiyo o'yinlari oldidan ikki mamlakat Olimpiya terma jamoalari o'rtasida o'rtoqlik o'yinini o'tkazish rejaga kiritildi. Har ikki tomon ham uzoq muddatli samarali hamkorlik qilishga tayyor ekanliklarini bildirdilar", – deyiladi O'FA matbuot xizmati taqdim etgan xabarda.