O'zbekiston terma jamoasining rasmiy mashg'uloti haqida

Sidneydagi muhtasham va mahobatli "Avstraliya" stadionida Mirjalol Qosimov boshchiligidagi jamoamizning mashg'uloti mahalliy vaqt bilan soat 17:30da boshlandi.

Ushbu sahifa orqali mashg'ulot haqida batafsil malumot berib boramiz.

Mashg'ulot terma jamoa shifokori Abror Pirrievni tabriklash bilan boshlandi. Futbolchilar va murabbiiylar Abror akani qarsaklar bilan muborakbod etishdi.

Dastlabki mashg'ulotda 22 nafar futbolchi ikkiga bo'linib gandbolga o'xshash o'yin o'ynashdi. Maydon yarmida bo'lib o'tgan o'yinda futbolchilar to'pni qo'llari bilan sheriklariga etkazishdi, lekin golni faqat bosh bilan urish mumkin bo'ldi.

"Qizillar": Akbar To'raev, SHavkat Mullajonov, Anzur Ismoilov, Akmal SHorahmedov, Vitaliy Denisov, Timur Kapadze, Aziz Haydarov, Sanjar Tursunov, Odil Ahmedov, Server Jeparov, Igor Sergeev.
"Ko'klar": Eldor Suyunov, Islom To'xtaxo'jaev, Egor Krimec, SHuhrat Muhammadiev, Farrux Sayfiev, Jasur Hasanov, Jamshid Iskanderov, Sardor Rashidov, Lutfulla To'raev, Vohid SHodiev, Bahodir Nasimov.

Mashg'ulot avvalida Ignatiy Nesterov bilan Pyotr Gizimchuk alohida shug'ullandi.

So'ngra futbolchilarimiz juft-juft bo'lib futbol o'ynashdi. Bunda asosiy qoida sherigining qo'lini qo'yib yubormay harakat qilish. Kichik o'yinda qizillar g'olib bo'lishdi. SHorahmedov-Tursunov va Ahmedov-Jeparov juftligi o'z hisoblariga gol yozib qo'yishdi.

OFK reglamentiga ko'ra mashg'ulotning faqatgina 15 daqiqasi OAV uchun ochiq bo'ldi. SHu bois biz KXDR vakillari ishtirokidagi matbuot anjumaniga shoshildik. 

Narzulla Saydullaev
Sidney shahridan