Osiyo Kubogi prevyusi. 1/4 final. Janubiy Koreya - Qatar
25 jan 2019 10:24
Yangiliklar
![](https://championat.asia/upload/storage/474130_original.jpg)
![](/upload/storage/474130_220.jpg)
Osiyo Kubogi prevyusi. 1/4 final. Janubiy Koreya - Qatar
Abu Dabidagi "Zayed Sports Siti" o'yingohida Janubiy Koreya Qatarga qarshi bahs olib boradi. Aytish mumkinki, chorak final juftliklari orasida kim favorit ekanligini topish eng qiyin bo'lgan juftlik shu.
Oldinlari Janubiy Koreya yaqqol favorit bo'lardi. Ammo hozirga kelib Qatar terma jamoasi ancha kuchaygan. Aytish mumkinki, Qatar musobaqada eng yaxshi o'yin namoyish etayotgan jamoalardan biri bo'lib turibdi.
Janubiy Koreya
Bu jamoa shu paytgacha ikki bor Osiyo Kubogida g'olib chiqqan. Bu yil uchinchi marta chempion bo'lishga harakat qilmoqda. Janubiy Koreya bungacha o'tkazilgan to'rtta bellashuvning hammasida zafar quchdi. Guruh bahslarida ular Filippin (1:0), Qirg'iziston (1:0) va Xitoy (1:0)ni mag'lub etishgan bo'lsa, 1/8 finalda Bahrayndan 2:1 hisobida ustun kelishdi. Koreyaliklar faqat Bayhrandan gol o'tkazib yuborishdi. Demak, jamoa himoyasi chakki emas.
Qatar
Bu jamoa ham shu paytgacha bo'lib o'tgan to'rtta o'yinning barchasida g'alabaga erishdi. Bundan ko'rinib turibdiki, bugun juda qiziqarli bahs guvohiga aylanamiz. Qatar guruh bosqichini Livanga qarshi 2:0 hisobidagi g'alaba bilan boshladi. SHundan keyin KXDR (6:0) va Saudiya Arabistoni (2:0) terma jamoalari mag'lub etildi. 1/8 finalda esa Qatar Iroqni 1:0 hisobida engib musobaqadan chiqarib yubordi. Ko'rib turganingizdek, Qatar hali Osiyo Kubogida gol o'tkazgani yo'q.
O'yindan oldingi fikrlar
Paulu Bentu (Janubiy Koreya termasi bosh murabbiyi): "Son Xyong Min hozircha gol urgani yo'q, lekin bu meni tashvishga solmaydi. Muhimi, u yaxshi o'ynayapti va boshqa futbolchilar gol uryapti. Qatarda ham himoya, ham hujum kuchli. Ular anchadan beri bir murabbiy qo'l ostida hamjihatlikda ishlab kelishyapti. To'p nazorati bizda bo'lsa, o'ylaymanki bu jamoani mag'lub eta olamiz".
Feliks Sanches (Qatar termasi bosh murabbiyi): "SHu paytgacha musobaqada juda yaxshi ishtirok etdik. Futbolchilarim bilan faxrlanaman, biz bir jamoa bo'la oldik. Buyog'iga yana shunday muvaffaqiyatli davom etishni istaymiz. Janubiy Koreya eng kuchli jamoalardan biri. Lekin o'z yo'limizda muvaffaqiyatli davom etishimiz uchun raqibni mag'lub etishimiz shart".
Osiyo Kubogi-2019. 1/4 final
25 yanvar. Abu Dabi. "Zayed Sports Siti" stadioni
Janubiy Koreya - Qatar
Boshlanish vaqti: 18:00.
O’xshash yangiliklar
![AMP Logo](https://championat.asia/image/logo-amp.png)
Fikrlar