Osiyo Kubogi. Iroq murabbiyi 2007 yilgi natija takrorlanishini xohlayapti

Bugun odatga ko'ra o'yinoldi matbuot anjumani tashkil qilindi. Matbuot anjumanida ishtirok etgan iroqliklar bosh murabbiyi Radhi SHenayshil quyidagi fikrlarni aytib o'tdi:

"Eronni musobaqadan chiqarib yuborishimizni ko'pchilik kutmagandi, lekin buni uddaladik. O'ylaymanki, Janubiy Koreya bilan bo'ladigan bahsda ham sensaciya qayd eta olamiz. Hozir Iroq futbolida yangi avlod shakllanib kelmoqda. Hozirgi futbolchilar bilan bemalol 2007 yilgi natijani, yani Osiyo chempionatidagi g'oliblikni takrorlay olamiz".

"Ertangi bahs juda qiyin kechadi. Turnirning yarim finaliga to'rtta kuchli jamoa etib keldi. Bizda bu o'yinga tayyorlanish uchun uch kun vaqt bo'ldi. Albatta, qisqa fursatda to'liq hozir bo'lish oson emas, lekin qo'ldan kelgancha harakat qildik. SHubhasiz, J.Koreya - Osiyoning eng kuchli jamoalaridan biri. Ammo bunday o'yinlarda reyting rol o'ynamaydi, kim kuchli bo'lsa o'sha g'alaba qozonadi. Raqibimizning O'zbekiston termasiga qarshi o'yinini ko'rdim, ular qarshi hujumda ancha kuchli ekan".