Osiyo Kubogi. Finaldan oldingi raqamlar

Bilasiz, bu jamoalar bir guruhda kurash olib borishdi va o'zaro o'yinning birinchisida koreyaliklar 1:0 hisobida zafar quchishdi. Ertaga bo'lsa, Avstraliya o'sha mag'lubiyat alamini olishga urinib ko'radi. Quyida final bahsi oldidan raqamlar bilan bog'liq bazi qiziqarli malumotlarni keltirib o'tamiz.

9. Avstraliya terma jamoasining o'yinchilari 9 mamlakat klublarida to'p tepishadi. Futbolchilar orasida Belgiya, Angliya, Germaniya, J.Koreya, Gollandiya, Qatar, Rossiya, Turkiya va AQSH milliy chempionatlarida faoliyat olib borayotgan o'yinchilar bor.

7. Avstraliya termasining etti nafar o'yinchisi ichki chempionat klublarida to'p tepishmoqda. Bular - Tomi Yurich, Mettyu Spiranovich ("Vestern Sidney"), Evgen Galekovich ("Adelaida Yunayted"), Mett Makkey ("Brisben Roar"), Mark Milligan ("Melburn Viktori"), Terri Antonis ("FK Sidney") va Natan Byorns ("Vellington Feniks").

4. Janubiy Koreya tarkibida to'rt nafardan futbolchi Germaniya va Qatarda o'ynashadi. Kim Jin Su, Park Ju Xo, Mon Xyon Ming va Ku Ja CHol Bundesliga klublarida faoliyat olib borayotgan bo'lsa, CHo Yong CHol, Nam Te Xi, Li Kyun Xo va Xan Kuk Yong Qatar klublari vakillari hisoblanadi.

2. Avstraliyalik Massimo Luongo hozircha ikki marta "Uchrashuvning eng yaxshi futbolchisi" deb topildi. U Quvayt va BAA bilan kechgan bahslarda shu nomga loyiq ko'rildi.

1. Ertaga Osiyo Kubogi finalida maydonga tushadigan futbolchilarning deyarli 100 foizi Evropa yoki Osiyo klublarida to'p tepishadi. Faqat birgina Tim Keyxill bundan mustasno. CHunki u AQSHning "Nyu York Red Buls" jamoasi sharafini himoya qilmoqda.