Osiyo Kubogi-2019. Janubiy Koreya - Filippin 1:0. O'yindan keyingi fikrlar

Bahs nihoyasiga etgach koreyaliklar ustozi Paulu Bentu quyidagi fikrlarni bildirdi:

"Biz o'yinni to'liq nazorat qilishga harakat qildik. Lekin raqib ham yaxshi himoyalangani uchun bo'sh zonalarni topish qiyin kechdi. Gol urganimizdan so'ng yanada erkinroq harakat qila boshladik va raqib himoyasida bo'shliqlar yuzaga keldi. CHunki gol o'tkazgach Filippin hujumga o'tishga majbur bo'ldi".

- Sizningcha, ikkinchi taym birinchi taymga nisbatan oson o'tdimi? 

- Men bunday demagan bo'lardim. CHunki futbolga to'liq 90 daqiqa qaragan maqul. Ikkinchi taymda gol urganimiz bu bo'lim ancha oson kechganini bildirmaydi. Futbol boshidan oxirigacha qiyin o'ynaladigan o'yin.

- Janubiy Koreyani boshqarishni boshlaganingizdan beri jamoa 7ta o'rtoqlik uchrashuvi o'tkazdi. Bugun esa birinchi rasmiy o'yin bo'ldi.
- Ha, shunday. O'rtoqlik o'yinlarida har doim bemalol harakat qilasan. Rasmiy bahslarda esa bosim yuqori bo'ladi. O'rtoqlik uchrashuvida siz ikki-uchta gol urishingiz mumkin. Lekin buning uchun hech qanaqa ochko yozilmaydi. Hammasi rasmiy o'yinlarga bog'liq. Men uchun muhimi hisob qanday bo'lmasin, uch ochkoni qo'lga kiritish.

O'z navbatida Filippin terma jamoasini boshqarayotgan Sven-Goran Eriksson ham o'yindan keyin fikrlarini bildirib o'tdi.

- O'yindan oldin aytganimdek, bizning bu erga kelganimizning o'ziyoq katta bayram. Filippin o'z tarixida birinchi marta shunday nufuzli musobaqada ishtirok etyapti. Endi o'yin haqida gapiradigan bo'lsam, kuchli raqibga qarshi bahs olib borib, kichik hisobda yutqazib qo'ydik. Janubiy Koreya kuchli jamoa va ularga qarshi o'ynash oson emas. Endi keyingi ikkita bellashuvda o'zimizni ko'rsatishga harakat qilamiz".

- Zaxiradan tushganlar o'yinni kuchaytirdimi?
- Hamma yaxshi o'yin ko'rsatishga harakat qildi. Menga to'rt nafar yarim himoyachimizning o'yini yoqdi. Zaxiradan tushganlar ham o'zlarini yaxshi ko'rsatishdi.

- Nima deb o'ylaysiz, jamoangiz keyingi turda Xitoyga qarshi qanday o'yin ko'rsatadi?
- Biz to'p bilan ko'proq muomala qilishni xohlaymiz. Lekin buning iloji bo'ladimi yo'qmi, bilmayman. CHunki Xitoy ham xuddi Janubiy Koreyaga o'xshab hujumkor futbol o'ynaydigan jamoa. Biz bu turnirda avvalo o'z o'yinimizni ko'rsatishga harakat qilishimiz kerak.