Osiyo Kubogi-2015. Eng yaxshi beshta darvozabon

Musboaqa rasmiy sayti Osiyo chempionatida o'ynaydigan eng yaxshi besh nafar darvozabon nomini keltirib o'tdi. Endi bu darvozabonlardan kimlar o'zini ko'rsatishini musobaqa davomida bilib olamiz.

Mettyu Rayan (Avstraliya)
Mark SHvarcer 2013 yil terma jamoadagi faoliyatini yakunlaganidan so'ng avstraliyalik ko'plab darvozabonlarga terma jamoa eshigi ochildi. Bungacha SHvarcer kamida besh yildan beri almashtirib bo'lmas darvozabon bo'lib kelayotgandi. Keyin esa Mettyu Rayan yarq etib porlab chiqdi. "Sentral Koast" safida uch mavsum o'ynab ko'pchilikka tanilgan yosh Rayan bu orada mamlakat chempioni bo'lishdan tashqari ikki bor "Eng yaxshi yosh o'yinchi" deb topildi. Keyinchalik Rayan o'z faoliyatini davom ettirish maqsadida Belgiyaning "Bryugge" klubiga yo'l oldi. Va o'zining Evropadagi birinchi mavsumidayoq "Eng yaxshi darvozabon" deb topildi. Mett Rayan Braziliyada o'tgan jahon chempionatida ham jamoasi darvozasini qo'riqladi. Endi u Osiyo chempionatida ham o'zini ko'rsatmoqchi.

Volid Abdulla (S.Arabistoni)
Volid Abdulla Saudiya Arabistoni milliy terma jamoasi safida katta o'rin tutadi. U 2007 yildan beri terma libosida o'ynab kelmoqda. "Al SHabab" posboni shu yilning kuzida o'tkazilgan "Ko'rfaz kubogi"da ham terma jamoa darvozasini qo'riqladi. 28 yoshli posbon uchun Avstraliyada bo'ladigan qita birinchiligi ikkinchi Osiyo chempionati hisoblanadi.

Ali Al Habsi (Ummon)
Ummon futboli yulduzlaridan biri Ali Al Habsi ketma-ket uchinchi bor Osiyo Kubogida qatnashishga tayyor. U o'z terma jamoasining eng ishonchli darvozaboni va sardori hisoblanadi. Terma jamoa safida 92ta o'yinda maydonga tushgan Al Habsi tez orada 100-uchrashuvini o'tkazishi mumkin.

Eyji Kavashima (Yaponiya)
Yaponiya hech qachon darvozabonlar tayyorlab beradigan futbol mamlakati bo'lmagan, lekin Eyji Kavashimaning etishib chiqqani bundan mustasno. "Samuraylar" tarkibida 50dan ziyod o'yin o'tkazgan Kavashima hech shubhasiz Yaponiya termasining asosiy posboni hisoblanadi. 2011 yilgi musobaqaning yarim finalida u koreyaliklarning penaltidan tepgan ikkita to'pini qaytargandi. Eyji Kavashima Yaponiyaning uchta klubida to'p tepgan. JCH-2010dan so'ng Belgiyaga yo'l olib, avvaliga "Lers", keyin "Standart" bilan shartnoma imzoladi. U hozir ham shu klubda faoliyatini davom ettirmoqda.

Alirizo Xagigi (Eron)
26 yoshli Alirizo Xagigi ham muxlislarga juda tez tanildi. U jahon chempionatida o'zini ko'rsata oldi, xususan Argentina bilan kechgan bahsda 90 daqiqa davomida o'z darvozasi daxlsizligini saqlay oldi. Biroq qo'shib berilgan daqiqalarda Messining qanday gol urgani yodingizda bo'lsa kerak. Xagigi 18 yoshidayoq "Piruzi"ning asosiy tarkibidan joy oldi. Keyinchalik Rossiyaning "Rubin" klubiga yo'l olgan eronlik darvozabon o'zini unchalik namoyish eta olmadi va "Piruzi"ga qaytdi. Xagigi shu yil o'tkazilgan jahon chempionatidan so'ng yana tilga tusha boshladi.