"Olmaliq": 4 nafar futbolchi ketdi, 3 nafar futbolchi keldi

Ertalab tibbiy tekshiruvdan o'tgan futbolchilar, kechki payt mashg'ulot o'tkazishdi. Jamoamiz safini 4 nafar futbolchi tark etdi. Akmal Ortiqov "So'g'diyona" jamoasiga ijara asosida ikkinchi davrani o'tkazadigan bo'lsa, yana bir posbon Temur G'aniev va ikki himoyachi Adrian Kashkaval va Sarvarjon Jo'raev faoliyatini boshqa jamoalarda davom ettirishadi. Moldovalik himoyachiga milliy chempionatimizning bir necha jamoasi qiziqish bildirgan. Sarvarjon Jo'raev esa "SHo'rtan" safida paydo bo'lishi mumkin.

Jamoada yuzaga kelgan bo'shliq Belorussiya oliy ligasida ishtirok etuvchi "Dinamo" (Brest) jamoasidan darvozabon Valeriy Fomichyov, "Buxoro" jamoasidan himoyachi Saidkomil Akbarov va birinchi davrada Toshkentning "Lokomotiv" jamoasida to'p surgan hujumchi Alisher SHog'ulomovlar evaziga to'ldirildi.

Ertaga "Olmaliq" jamoasi azolari o'quv-mashg'ulot yig'ini o'tkazish uchun Turkiyaga yo'l olishadi. 10-22 iyul kunlari o'tadigan mashg'ulotlar jarayonida 3ta o'rtoqlik o'yini tashkillashtiriladi. Turkiyadagi mashg'ulotlarda O'zbekiston olimpiya terma jamoasiga chaqiruv olgan darvozabonlar murabbiyi Vyacheslav Tomilin va hujumchi Islombek Isoqjonov ishtirok etmaydi. Jamoaning yana to'rt vakili Nikita Pavlenko, Jahongir Abdumo'minov, Diyor Turopov va Doniyor Ismoilovlar 19 iyul kuni ortga qaytishadi. Ular mamlakat olimpiya terma jamoasining 20-25 iyuldagi yig'inida ishtirok etishadi.

Jamoa tarkibini kuchaytirish ikkinchi davra boshlangunga qadar davom etishi rejalashtirilgan.