Oliy liga. Bugun 10-turning beshta o'yini o'tkaziladi
28 may 2016 13:06
Yangiliklar
![](https://championat.asia/upload/storage/209460_original.jpg)
![](/upload/storage/209460_220.jpg)
Oliy liga. Bugun 10-turning beshta o'yini o'tkaziladi
SHu tariqa "Obod" joriy mavsum hisobidan birinchi bor g'alabaga erishdi. Jamoa bungacha ikki bor durang o'ynab, ettita o'yinda mag'lub bo'lgandi.
Bugun taqvimdan o'rin olgan yana beshta uchrashuv bo'lib o'tadi. "Paxtakor" o'z maydonida "Neftchi"ni qabul qilsa, "Bunyodkor" safarda "Nasaf" mehmoni bo'ladi. Turnir jadvalida oxirgi o'rinda borayotgan "SHo'rtan" esa "Andijon" bilan bellashadi. Quyida shu va boshqa juftliklarga to'xtalib o'tamiz.
PAXTAKOR - NEFTCHI
Boshlanish vaqti: 18:45
Bosh hakam: Aziz Asimov
Turnir jadvalidagi o'rni: "Paxtakor" 6-o'rin (15 ochko), "Neftchi" 10-o'rin (10 ochko)
Ochkolar orasidagi farq: besh ochko
Tarif: "Paxtakor" - "Neftchi" qarama-qarshiligi bir paytlar "o'zbek klassikosi" deyilardi. Hozir bu nomga ancha putur etgan. Orada ayniqsa "Neftchi" ancha kuchsizlanib qoldi. Jamoaning bu yilgi o'yini sira qovushmayapti. SHunga qaramay, "Paxtakor" stadionida qiziqarli futbol guvohiga aylansak ajab emas.
Fakt: "Paxtakor" hozircha o'z maydonida beshta o'yin o'tkazib, shundan to'rttasida g'alaba qozondi. Faqat "Nasaf" bilan kechgan bahsdagina durang qayd etildi xolos. Lekin jamoa oxirgi uchta rasmiy o'yinda (oliy liga va Kubok) gol ura olmadi. "Neftchi" esa safarda beshta uchrashuv o'tkazgan bo'lsa, shundan to'rttasida mag'lub bo'ldi. Jamoa hisobida safar o'yinlarida faqat bitta g'alaba bor, u ham bo'lsa "Mashal" bilan qayd etilgan.
NASAF - BUNYODKOR
Boshlanish vaqti: 19:30
Bosh hakam: Ilgiz Tantashev
Turnir jadvalidagi o'rni: "Nasaf" 3-o'rin (22 ochko), "Bunyodkor" 2-o'rin (25 ochko)
Ochkolar orasidagi farq: uch ochko
Tarif: Bemalol turning markaziy uchrashuvi deya olamiz. Oliy ligada mag'lub bo'lmagan ikkita jamoa qoldi: "Lokomotiv" va "Bunyodkor". "Bunyodkor" bugun ham mag'lubiyatsiz seriyasini davom ettira oladimi? Buni Qarshidagi bahs ko'rsatib beradi.
Fakt: "Nasaf" o'tgan turda dastlabki mag'lubiyatini qabul qilib oldi. Jamoa safarda "Metallurg"ga imkoniyatni boy berdi. Bungacha "Nasaf" qatorasiga to'rt o'yinda g'alaba qozongandi. "Bunyodkor" esa bungacha faqat bir marta durang o'ynab, qolgan barcha uchrashuvlarda zafar quchdi. Jamoa OCHLda o'zinini ko'rsata olmagan bo'lsa-da, oliy ligada chempionlik sari harakat qilmoqda. Agar "Bunyodkor" bugun yutqazgudek bo'lsa, bu jamoaning ilk mag'lubiyati bo'ladi.
OLMALIQ - MASH'AL
Boshlanish vaqti: 18:30
Bosh hakam: Olim Tolibjonov
Turnir jadvalidagi o'rni: "Olmaliq" 12-o'rin (9 ochko), "Mashal" 13-o'rin (7 ochko)
Ochkolar orasidagi farq: ikki ochko
Tarif: Turnir jadvalida yonma-yon borayotgan jamoalar bahsi. Bu o'yinda kim g'alaba qozonsa, o'z raqibidan bir pog'ona yuqoriga ko'tarilib oladi. Ikkala jamoa ham mavsumni past saviyada o'tkazmoqda. Vaholanki, "Mashal"ning ham, "Olmaliq"ning ham yuqori o'rinlarda yurishi taxmin qilingandi.
Fakt: "Olmaliq" hisobida atigi uchta g'alaba bor va uchalasi ham o'z maydonida qo'lga kiritilgan. Jamoa hozircha durang o'ynagani yo'q. Ketma-ket to'rt bor yutqazgan "Mashal" nihoyat o'tgan turda g'alaba nashidasini surdi. Muborakliklar shu paytgacha safarda beshta o'yin o'tkazib, shundan to'rttasida yutqazib, bir bor durang o'ynashdi.
QIZILQUM - METALLURG
Boshlanish vaqti: 19:00
Bosh hakam: Vladislav Ceytlin
Turnir jadvalidagi o'rni: "Qizilqum" 5-o'rin (17 ochko), "Metallurg" 4-o'rin (19 ochko)
Ochkolar orasidagi farq: ikki ochko
Tarif: Jadvalda yonma-yon o'rinlarni egallab turgan jamoalarning yana bir bahsi. O'ylaymizki, Navoiyda juda qiziqarli bahs muxlislarni kutib turibdi. Ikkala jamoaning ham bu yilgi o'yini tahsinga loyiq. Bu uchrashuvda kim g'alaba qozonishini oldindan aytish qiyin.
Fakt: "Qizilqum" oxirgi to'rt o'yindan ikkitasida g'alaba qozondi va ikki bor mag'lub bo'ldi. Jamoa bungacha qatorasiga besh o'yindirki mag'lubiyat nimaligini bilmay kelayotgandi. Safarda to'rtta bahsda maydonga tushgan "Metallurg" shundan ikkitasida yutqazib, bir g'alaba va bir durang qayd etdi. Bugun "Metallurg" safardagi beshinchi uchrashuvini o'tkazadi.
ANDIJON - SHO'RTAN
Boshlanish vaqti: 18:00
Bosh hakam: Ravshan Ermatov
Turnir jadvalidagi o'rni: "Andijon" 11-o'rin (9 ochko), "SHo'rtan" 16-o'rin (4 ochko)
Ochkolar orasidagi farq: besh ochko
Tarif: Oliy ligada qolish uchun kurashayotgan "SHo'rtan" bugun "Andijon" mehmoni bo'ladi. G'uzorliklarni bu yil sira tanib bo'lmayapti. Jamoa hisobida faqat bittagina g'alaba bor. Aytish mumkinki, ikkala klub ham deyarli teng tarkibga ega. Bu o'yinda mezbon ham, mehmon ham yutib ketishi mumkin.
Fakt: "Andijon" o'zining uchta g'alabasiga faqat uydagi o'yinlar orqali erishgan. Jamoa safarda hatto durang qayd etolgani yo'q. "SHo'rtan" ham safarda g'alaba qozonmagan jamoalar sirasiga kiradi. Ular 7-turda "Neftchi" bilan 2:2 hisobida durang o'ynashgandi. Bugun ham "SHo'rtan" vodiy klubiga qarshi maydonga chiqadi.
![AMP Logo](https://championat.asia/image/logo-amp.png)
Fikrlar