Oleg Zoteev kecha nega o'ynamadi?

Etibor bergan bo'lsangiz, kechagi o'yinda "Lokomotiv"ning ikki nafar qanot himoyachisi maydonga tushmadi. Davron Hoshimov sariq kartochkalari soni to'rttaga etgani bois "Bunyodkor"ga qarshi bahsni o'tkazib yuborgan bo'lsa, chap qanot himoyachisi Oleg Zoteev ayni paytda davolanayotgani sababli o'yinda ishtirok eta olmadi. 

Albatta, muxlislarda Zoteev nima uchun ko'rinmadi, u jarohat oldimi degan savol yuzaga kelgan bo'lishi turgan gap. Bu kabi savollarga "Lokomotiv" futbol klubi hamda O'zbekiston milliy terma jamoasi shifokori Abror Pirriev quyidagicha javob berdi: 

- "24 avgust kuni Oleg Zoteev umumiy shamollash fonidagi birlamchi meningit tashhisi bilan stacionar davolanishga yotqizildi. Odatda bunday paytda bemorning ikki hafta kasalxonada yotib davolanishi talab etiladi. SHundan so'ng yana ikki hafta tiklanish muolajasiga ketadi. Oddiy qilib aytganda, Oleg Zoteevda bosh va orqa miya qobig'ining shamollashi kuzatilgan. Bu xavfli kasallik emas, faqat muntazam vrach nazoratida bo'lib davolanishi talab etiladi. Futbolchi yaxshilab davolangach bir oydan keyin yana safga qaytadi". 

Bilasiz, Oleg Zoteev 28 avgustdan boshlanadigan O'zbekiston terma jamoasining o'quv-mashg'ulot yig'inlariga jalb qilingandi. Ammo ayni paytda davolanayotgani sabab terma jamoaning sentyabr oyidagi ikkita o'yinida ishtirok eta olmaydi. Umid qilamizki, "Lokomotiv"ning mohir futbolchisi tez orada safga qaytib, klub hamda terma jamoa o'yinlariga yordam beradi.

Oleg Zoteevga tezroq sog'ayib ketishini tilaymiz!