OCHL oldidan. "Nasaf" uchinchi marta o'zida Eron klubini qabul qiladi

Bugun Qarshida "Nasaf"ni juda muhim bahs kutib turibdi. Negaki jamoa o'z maydonida Eronning eng nomdor klublaridan biri "Persepolis"ni qabul qiladi. Esingizda bo'lsa, Tehronda kechgan o'yinda "Nasaf" 0:3 hisobida yutqazib qo'ygandi. Bugun qarshiliklar o'sha mag'lubiyat alamini olishga harakat qilib ko'rishadi.

OCHL. "S" guruhi. 5-tur. 2 aprel
19:30. "Nasaf" - "Persepolis"
21:00. "Al Sadd" - "Al Vasl"

Guruhdagi vaziyat: "Al Sadd" va "Persepolis" hisobida 9 ochkodan bor va birinchi-ikkinchi o'rinlarni egallab turishibdi. "Nasaf" 6 ochko bilan uchinchi o'rinda borayotgan bo'lsa, BAAning "Al Vasl" klubi barcha o'yinlarda mag'lubiyatga uchrashi natijasida 0 ochko bilan oxirgi o'rinda turibdi.

Bilasizmi? Bugun "Nasaf" o'z tarixida uchinchi marta OCHLda Eron klubini qabul qiladi. Qarshiliklar ilk bor 2012 yil Tehronning "Istiqlol" klubi bilan o'ynab 0:2 hisobida imkoniyatni boy berishgan. 2015 yil "Traktorsozi"ga qarshi o'tkazilgan bellashuvda esa "2:1 hisobida "Nasaf"ning qo'li baland kelgan. O'shanda Ilhom SHomurodov va Hamza Karimovning goli maydon egalariga g'alaba keltirgandi.

Bugun shuningdek, "D" guruhida ham bahslar davom ettiriladi. "Al Ayn" o'z maydonida "Al Hilol"ni qabul qilsa, "Istiqlol" "Ozodi" stadionida "Al Rayan"ga qarshi maydonga tushadi. Har ikkala uchrashuv 20:30da boshlanadi.