OCHL. Dastlabki turning ramziy terma jamoasi

Saytimiz xodimlari dastlabki turda O'zbekiston klublari safida o'zini ko'rsatgan futbolchilardan iborat ramziy terma jamoasini tuzishdi.

Darvozabon
Ignatiy Nesterov ("Lokomotiv")

Darvozaga "Lokomotiv" klubining tajribali posboni Ignatiy Nesterovni loyiq ko'rdik. Darvozabon "Al Ittihod"ga qarshi bahsda bitta gol o'tkazgani rost, ammo yana bir vaziyatda jamoasini muqarrar goldan qutqarib qoldi. Keyingi o'yinlarda Nesterovga umuman gol o'tkazmasligini tilaymiz.

Himoyachilar
Davron Hoshimov ("Paxtakor")
SHerzod Fayziev ("Lokomotiv")
SHerzod Azamov ("Nasaf")
Akrom Komilov ("Bunyodkor")

"Paxtakor" klubi himoyachisi Davron Hoshimov "Al Hilol" bilan bahs so'nggida jamoa qahramoniga aylandi. U Jamshid Iskanderov tomonidan uzatilgan to'pni jarima maydoniga kirmay darvozaga joylab qo'ydi va "Paxtakor"ni mag'lubiyatdan qutqarib qoldi.

"Lokomotiv"ning yangi azosi SHerzod Fayziev OCHLdagi debyut uchrashuvida yomon taassurot qoldirmadi. Himoyachi tajribali hujumchilarga deyarli imkoniyat bermadi. Bir qator vaziyatlarda xatolar qildi, ammo debyut uchun ajoyib o'ynadi.

"Nasaf"ning markaziy himoyasida SHerzod Azamov o'ynadi. Agar u bo'lmaganida arablar "ajdarlar" darvozasiga yanada ko'p gol urishlari mumkin edi.

"Al nasr" bilan safardagi bahsda "Bunyodkor"ning chap qanotida Akrom Komilov ishonchli o'ynadi. Himoyachi o'z qanotida raqiblarga hujum qilish imkonini bergani yo'q. Bir nechta to'p uzatishlari xavfli chiqdi, ammo hujumchilar gol ura olishmadi.

Yarim himoyachilar
Kaxi Maxaradze ("Lokomotiv")
Javohir Sohibov ("Paxtakor")
Dilshod Rahmatlullaev ("Nasaf")
Sardor Mirzaev ("Lokomotiv")
Dostonbek Hamdamov ("Bunyodkor")

"Paxtakor"dan "Lokomotiv"ga ko'chib o'tgan Kaxi Maxaradze "Al Ittihod"ga qarshi bahsda eng yaxshilardan biri bo'ldi. Tayanch yarim himoyasida arablarning bir qator hujumlarini to'xatishga muvaffaq bo'lgan gruziyalik futbolchi gol urishga ham erishdi, ammo hakamlar o'sha paytda qoida buzilgani uchun golni inobatga olishmadi.

"Paxtakor" vakili Javohir Sohibov "Al Hilol" bilan o'yinda markazda yangi jamoadoshi Azim Ahmedovni qo'llab quvvatlab turdi. Sohibov Kaxi ketgach markazda jamoaning asosiy o'yinchisiga aylandi. Kechagi bahsda u buni deyarli uddalay oldi.

"Lokomotiv"dan "Nasaf"ga o'tgan Dilshod Rahmatullaev "Al Ahli" bilan o'yinda jasorat ko'rsatgani uchun ham ramziyga loyiq ko'rildi. Ikkinchi bo'limda raqib uning boshini yordi, Dilshod esa shu jarohat bilan ham o'yinni oxirigacha etkazib qo'ydi. Bundan tashqari birinchi bo'limda aynan uning pasidan so'ng Bobur Abduxoliqov gol urishga erishdi.

"Lokomotiv"ni mag'lubiyatdan qutqarib qolgan golni Sardor Mirzaev urdi. "Al Ittihod" bilan bahsning 88-daqiqasida aynan uning zarbasidan so'ng hisob tenglashdi. Qizig'i o'tgan yil ham OCHLning birinchi turida Mirzaev "Loko"ning ilk golini urgandi.

"Bunyodkor" yarim himoyachisi Dostonbek Hamdamov dastlabki turda OCHLda ikkita gol urgan 4 futbolchidan biri bo'ldi. 2015 yil Osiyoning eng yaxshi futbolchisi deb topilgan Hamdamov "Al Nasr"ga qarshi bahsda ikkita chiroyli gollar urdi. Aynan uni O'zbekiston klublari ichida 1-turning eng yaxshi futbolchisi deb topdik.

Hujumchi
Bobur Abduxoliqov ("Nasaf")
"Nasaf" Saudiya Arabistonida "Al Ahli"ga yutqazib qo'ydi. Ammo "ajdarlar" safida 18 yoshli Bobur Abduxoliqov o'zini yorqin tomonlama namoyish eta oldi. Birinchi bo'limda ikkita qulay imkoniyatga ega bo'lib bitta gol urdi. Bobur mehnat qilishda davom etsa bunday ramziy terma jamoalardan doimiy o'rin olib turishiga shubha yo'q.