Nurillo To'xtasinov: "Terengganu"ni xalqaro maydon tufayli tanladim"

Biz To'xtasinov bilan bog'lanib, yangi klubidagi ilk taassurotlari bilan qiziqdik.

- "Terengganu"dan birinchi taklif qachon bo'lgandi?
- Taxminan 2 oycha oldin Malayziya klubidan qiziqish borligini agentim aytgandi. O'ylab ko'rdik va rozilik berdim.

- Sir bo'lmasa yana qaysi klublardan qiziqish bo'lgandi?
- Eronning "Traktorsozi" va BAAning "Al Ittixod Kalba" klublaridan qiziqish bo'lgandi.

- Nega aynan "Terengganu"ni tanladingiz?
- Sababi ushbu klub yangi mavsumda OFK kubogida ishtirok etadi. Xalqaro maydonda o'ynash ishtiyoqi hamda klub rahbariyatining o'z oldiga qo'ygan maqsadi tufayli shu klubni tanladim.

- Bosh murabbiy bilan gaplashdingizmi? U sizdan aynan nima xohlayotganini aytdimi?
- Ha, albatta bosh murabbiy bilan suhbatlashdim. Mendan hujumchilarga ko'proq yordam berish, hamda imkon bo'lishi bilan darvoza tomon zarbalar berishimni so'radi.

- "Terengganu"da o'zbekistonlik himoyachi Sardor Qulmatov ham o'ynamoqda. Sardor klubga moslashishga qanchalik yordam bermoqda?
- To'g'risini aytsam hali Malayziyaga uchib bormasimdan Sardor aka bilan gaplashib turdim va turli maslahatlar oldim. Klubga moslashishimga katta yordam bermoqdalar. Uylarimiz juda yaqin.

- Malayziyada chempionat tugashiga 10ta tur qoldi. Ayni paytda klub 6-o'rinda ekan. O'tgan yil "Terengganu" chempionatda 2-o'rinni olgandi. Bu yil qaysi o'rinni egallasa muvaffaqiyat hisoblanadi?
- To'g'ri chempionatda ishlar u qadar zo'r emas. Lekin hali o'yinlar ko'p va imkon qadar yuqoriroq o'rinlardan birini egallash uchun harakat qilamiz. Eng asosiy maqsad OFK kubogida munosib natija qayd etish.

- Klub infratuzilmasi (stadion, baza) haqida nima deya olasiz?
- Ajoyib. Klub bazasida 4 yoki 5ta mashg'ulot maydoni borligining o'zi katta narsa. Bu erda futbolchilar uchun barcha sharoitlar yaratilgan.

- "Neftchi" klubi va uning muxlislariga nima deysiz?
- "Neftchi" klubiga, rahbariyatdan tortib oddiy xodimgacha rahmat aytaman. Muxlislar bizni ajoyib tarzda qo'llab turishdi, ikkinchi davrada ham ulardan "Neftchi"ni bundan ham kuchliroq qo'llab-quvvatlashlarini so'rayman. Ikkinchi davrada "Neftchi"ga omad tilayman!