"Nottingem Forest" "Yunayted" bilan o'yindagi hakamlikdan arz qilmoqchi

"Nottingem Forest" APLning 3-turi doirasida "Manchester Yunayted"ga qarshi o'yinda ishlagan Styuart Ettuell hamda uning yordamchilari ustidan shikoyat kiritmoqchi. Klubdagilar hakamning kechagi o'yindagi xatti-harakatlaridan jaxl otiga minishgan.

"Forest" egasi Evangelos Marinakis ushbu o'yinni o'z uyida Afinada tomosha qilgan va hakamning qarorlaridan jaxli chiqqan. Endi greciyalik biznesmen "past saviyada ishlagan" hakamga jazolar kiritilishini istamoqda.

Uchrashuvning 66-daqiqasida maydondan chetlatilgan Jo Uorrel o'z jarima maydonchasi yonida Brunu Fernandeshni yiqitdi. Bosh hakam bu folni so'nggi umid foli deb hisoblagan. O'z navbatida VARdagilar ham Styuartning qarorini qo'llab-quvvatlagan.

Nottingemliklar bu holatdan xavotirga tushishgan, sababi ushbu hakamning aynan ushbu jamoa bilan bu birinchi holati emas. 2021/22 yilgi mavsumda CHempionshipda "Bornmut"ga qarshi o'yinida "Nottingem" penalti tepishi kerak bo'lgan vaziyatda hakamlar offsayd aniqlab, penalti berishmagandi. Ettuelning "Forest" ishtirokidagi navbatdagi o'yini kecha "Yunayted" bilan o'yinga to'g'ri keldi.

"Yunayted"ning oldingi uy o'yinida mankunianliklar raqibi "Vulverxempton" bosh murabbiyi Gari O′Nil ham hakamlikdan noligandi. O'sha uchrashuvning so'nggi daqiqalarida Andre Onana raqibiga ishlatgan foli sababli penalti berilishi kerak bo'lgandi. Biroq penalti berilmagan, yakunda o'sha bahs hakami bir turga chetlatilgandi.