Nosir Abdusalomov: "Qo'qonda 120 daqiqa oson bo'lmagandi, "Dinamo" bilan o'yinga o'ziga hos kuch topa oldik"

“Bunyodkor” jamoasining birinchi davradagi kashfiyoti Nosir Abdusalomov “Dinamo”ga qarshi uchrashuvda 1 ta gol va 1 ta assist bilan ajralib turdi. “Qo'qon-1912” bilan uzoq davom etgan 120 daqiqalik bahsdan so'ng, u "Dinamo"ga qarshi jamoa qanday tayyorgarlik ko'rgani, o'z taassurotlari haqida gapirdi. 

— Nosir, “Qo'qon-1912”ga qarshi 120 daqiqalik og'ir o'yindan so'ng “Dinamo”ga qarshi tayyorgarlik qanday kechdi?

— Albatta, “Qo'qon-1912”ga qarshi o'yin juda og'ir kechdi. Biz juda ko'p kuch sarfladik. Lekin “Dinamo”ga qarshi uchrashuv biz uchun juda katta ahamiyatga ega edi. O'ziga hos kuch topa oldik. Shu boisdan jismonan ham, ruhan ham qattiq tayyorgarlik ko'rdik. Bu o'yinga butun jamoa bor kuchi bilan tayyorlandi. Har bir o'yin o'zgacha, lekin “Dinamo”ga qarshi bahs alohida etibor talab qilardi.

— “Dinamo” shu paytgacha mag'lubiyatni bilmagan jamoa edi. “Bunyodkor” qanday uddaladi? O'yin sizda qanday taassurot qoldirdi?

— “Dinamo” haqiqatan ham kuchli, hujumkor jamoa. Ularning tarkibi va o'yin uslubi jiddiy etiborga loyiq. Lekin har bir jamoaning kuchli va kuchsiz jihatlari bo'ladi. Murabbiylarimiz aynan shu nuqtalarga etibor qaratdi, kerakli ko'rsatmalarni berdi. Biz esa ularni maydonda bajarishga harakat qildik va, shukr, natija berdi. Bunday g'alabalar jamoaning ishonchi va kayfiyatini ancha oshiradi.

— Oldingi chiziqda Temurxo'ja Abduxoliqov bilan yaxshi tandem yaratdingiz. Undan ko'proq nimalar o'rganyapsiz?

— Temurxo'ja aka — haqiqiy lider va katta tajriba egasi. U kishi bilan birga o'ynash men uchun ham sharaf, ham maktab. Maydondagi harakatlar, qaror qabul qilishdagi hotirjamlik, raqibni his qilish — bularning barchasini ulardan o'rganish mumkin. Har bir mashg'ulotda, har bir o'yinda ularning tajribasi menga katta yordam berayapti. Hamkasb sifatida ham, inson sifatida ham hurmatga sazovor.

— “Bunyodkor” Superligada ancha vaqt g'alabaga erisha olmayotgandi. Jamoa ruhiy qiyinchilikdan chiqib oldimi?

— Ha, to'g'ri aytdingiz. Bir necha tur g'alaba qo'lga kirita olmayotgandik. Bu, albatta, jamoaning psixologik holatiga tasir qilmay qolmaydi. Lekin ana shunday kuchli jamoalar ustidan qozonilgan g'alabalar bizga katta kuch beradi. Jamoada yana ishonch paydo bo'ldi. Xudo xohlasa, shunga o'xshash o'yinlar orqali oldindagi turlarda ham g'alabalarimizni davom ettiramiz.