Nodirxo'ja Yuldashevning yangi yil tabrigi!

Yil davomida saytimiz bilan birga bo'lgan o'quvchilarga katta rahmat aytgan holda har bir klub azolarini chin yurakdan muborakbod etaman.

Yil davomida, bu yil 10-chempionlikni qo'lga kiritamizmi deb, oxir-oqibat chempion bo'lgan "Paxtakor" muxlislarini. Eh, attang, bu yil ham o'xshamadi, "zato" Kubok bizniki deb quvongan "Lokomotiv" muxlislarini. Eng yaxshi legioner bizda deb gerdayib yuradigan "Nasaf" muxlislarini. Rivaldoni qo'msab, to'rtinchi o'rinni hazm qila olmayotgan "Bunyodkor" muxlislarini. O'rinbosarlarimiz chempion deb, Xomyakovga 5-o'rin uchun rahmat aytayotgan "Mashal" muxlislarini. Qachon biz ham kuchli uchlikka kiramiz deb Igor SHkviringa murojaat qilayotgan "Olmaliq" muxlislarini. Rijkoning penaltilariga zo'rg'a chidagan "Navbahor" muxlislarini. Yil davomida Murod aka Saidovni qaytaring deb dardini "koment"da bayon qilgan "Neftchi" muxlislarini. Yutib turib, yutqazib qo'yamiz-da deb kulib qo'yadigan "Metallurg" muxlislarini. Bobojonovning golidan xursand bo'lib "Bunyodkor"ni tarixda ilk marotaba yutgan "Dinamo" muxlislarini. Zarafshondan Navoiyga ko'chib ketgan "Qizilqum" muxlislarini. CHempiondan ochko olgan uchta jamoadan biri biz deb gerdaygan "Buxoro" muxlislarini. Keyingi yil yangi stadionda o'ynaymiz, tushib ketma "So'g'diyona" deb jon kuydirgan jizzaxlik muxlislarni. 50 yillikni o'tkazamiz deb "kiydirib" ketishdi deb saytimizga tinim bermagan "Andijon" muxlislarini. "Lyuboyi"ni gapiga, futbol vatani qaer deb mot qiluvchi savol bilan "yopishtiradigan" "Qo'qon-1912" muxlislarini. O'z paytida OFK kubogida to'p tepgan "SHo'rtan" muxlislarini va eng, eng, eng muhimi bo'lgan, barcha-barchamizni mana shu saytda birlashtirib turgan O'ZBEKISTON milliy terma jamoasining ashaddiy muxlislarini, unda kim to'p tepmasin, kim bosh murabbiy bo'lmasin, doimo qo'llab-quvvatlab turadigan ashaddiy muxlislarimizni YANGI YIL bayrami bilan TABRIKLAYMAN!

Nodirxo'ja Yuldashev