Nikita Ribkin: “Terek” bizdan kuchli o'ynagani yo'q”

O'yinda “sherlar” darvozasini qo'riqlagan Nikita Ribkin bilan aloqaga chiqib, uchrashuv borasidagi fikrlari bilan qiziqdik.

- "Terek"ka qarshi o'yin haqida nima deya olasiz? Raqib nimaning evaziga g'alaba qozondi?
- Ochig'ini aytganda, “Terek” juda kuchli emasdi. Birinchi bo'limda tashabbus biz tomonda bo'ldi. Ikkinchi bo'limda hushyorlikni yo'qotdik, shu sababli qisqa vaqt ichida ikkita gol o'tkazib yubordik. Agar 1:0 hisobida oldinda borayotganimizda imkoniyatdan foydalana olganimizda bahs bizning foydamizga hal bo'lishi mumkin edi.

- Jamoa tarkibiga yangilardan Kamoliddin Tojiev, Egor Krimec va Artyom Filiposyan qo'shilgan. Ular haqida nima deya olasiz?
- Avvalo Kamoliddin Tojiev va Egor Krimec jamoada yangi deb bo'lmaydi. Ular bir necha yil davomida “Paxtakor”da o'ynashgan. Egor Krimec bir yil davomida Xitoyda o'ynab ancha katta tajriba orttirdi. U milliy terma jamoa darajasiga etdi. Kamoliddin Tojiev juda tajribali futbolchi, yoshlarga uning foydasi tegadi. Artyom Filiposyan esa yaqindagina jarohatdan so'ng umumiy guruhga qaytgan bo'lishiga qaramay, kechagi o'yinda o'zidan yaxshi taassurot qoldirdi.

- O'z o'yiningiz borasida nima deya olasiz? Raqib safida qaysi futbolchi darvozangiz tomon ko'proq zarba berdi?
- O'z o'yinim borasida hech nima deya olmayman, bundan ham yaxshiroq o'ynash uchun nimalar ustida ishlash kerakligini bilaman. “Terek”da kim ko'p zarba berganini sanaganim yo'q. Bundan tashqari, himoyachlar ham menga yordam berib turishdi va bir qator vaziyatlarda xavfni bartaraf qilishdi.