Navro'zdan Navro'zgacha. Oxirgi 4 yilda “Orol”da eng ko'p gol urgan 10 futbolchi

9-10. Navro'z Alimov – 6 gol
Alimov 2016 yili Oliy ligadan Birinchi ligaga qaytdi va nukusliklar tarkibida yarim mavsum davomida 6 ta golga mualliflik qildi. Navro'z hisobida Birinchi ligada urilgan gollarning umumiy soni 30 tadan ortiqni tashkil etadi.

9-10. Oybek Ro'zimov – 6 gol
Ro'zimov 2014, 2015 va 2017 yillarda o'z hisobiga bittadan gol yozdirib qo'ygan bo'lsa, 2016 yili 3 ta gol kriitib, shaxsiy rekordini o'rnatdi.

8. SHukurullo Qutibaev – 7 gol
Qutibaevlar sulolasi vakili 2014 yili 6 ta gol kiritib, hujumchilik qobiliyatini ko'rsatgan edi. Biroq keyingb mavsumda u atigi bitta golga mualliflik qildi. SHundan so'ng u “Orol” safida ko'rinish bermadi.

7. Damir Nizanov – 8 gol
Nizanov 2014 yilda 4 ta, 2015 yili esa bitta golga mualliflik etdi. O'tgan mavsumning ikkinchi qismida yana Nukusga qaytgan Damir uch marta raqiblar posbonlarini ranjitib qo'ydi.

6. Miras Qarlibaev – 9 gol
Birinchi ligadagi eng qo'pol futbolchilardan biri hisoblanadigan Qarliboev 2015 yilda 2 ta gol urgan edi. 2016 yilgi mavsumni “Xorazm”da o'tkazgan yarim himoyachi 2017 yilda yana “Orol”ga qaytdi. Mavsum davomida uch marta maydondan chetlatilgan yarim himoyachi 5 ta gol kiritdi.

5. Islom Seytnazarov – 10 gol
“Qora bola” laqabli Seytnazarov 2014 va 2015 yillarda bittadan, 2016 yili uchta va o'tgan mavsumda beshta gol kiritdi. Oxirgi 4 yilda uning hisobiga 10 ta gol yozildi. Islom Birinchi ligada umumiy hisobda 20 dan ortiq gollarga mualliflik qilgan.

3-4. SHariyar Karimboev – 12 gol
SHariyar oxirgi ikki mavsumni yaxshi o'tkazdi. 2016 yilda 5 ta, 2017 yilda 7 ta gol kiritgan Karimboevdan bu yilgi mavsumda muxlislarning umidlari katta.

3-4. Temur Turdiev – 12 gol
“Orol”ning o'ynovchi murabbiyi himoyachi bo'lishiga qaramasdan, so'ngi 3 yilda 12 ta gol kiritgani tahsinga loyiq. Turdiev 2015 va 2017 yillarda uchtadan gol urgan bo'lsa, 2016 yilda u 6 ta golga mualliflik qilib, himoyachilar uchun o'rnak bo'lgan edi.

2. Rinat SHilmanov – 16 gol
SHilmanov ham so'ngi ikki yilda o'zini ko'rsatdi. 2016 yili 7 ta gol kiritgan hujumchi, o'tgan mavsumda 9 ta gol bilan nukusliklarning to'purariga aylandi. Ajab emas, yaqin yillar ichida Rinatni ham Oliy liga jamoalarida ko'rsak.

1. Navro'z Xaipov – 51 gol
27 yoshli hujumchi Birinchi ligadagi eng kuchli futbolchilardan biri hisoblanadi. Xaipov 2014 yili 11, 2015 yili 4 ta gol urgan bo'lsa, 2016 yilda 30 ta gol bilan Birinchi liga to'purariga aylandi. SHundan so'ng Oliy ligaga yo'l olgan hujumchi, o'tgan mavsum yarmida yana “Orol”ga qaytdi va 6 marta raqiblar darvozasini ishgol qildi. Umumiy hisobda u oxirgi 4 yilda 51 ta gol urishning uddasidan chiqdi.

Furqat Yusupov