Navbahorni davralar oralig'ida kimlar tark etishi mumkin?

Ortda qolgan 11 tur yakunlariga ko'ra Navbahor musobaqa jadvalida 14 jamoa ichida to'qqizinchi bo'lib turibdi. Qayd etilgan natijalarni klub imkoniyati bilan qiyoslaganda qoniqarli deb aytsa bo'ladi. Ashurmatovdan o'zga murabbiy bo'lganda hozirgi natijalar qo'lga kiritilishiga ishonish qiyin bo'lardi.

Baxtiyor Ashurmatov futbolchilarni rahbariyatniing amalga oshirolmayotgan vadalari bilan ovuntirib kelmoqda. Futbolchilar ham og'ir sharoitda bo'lsa ham maydonda bor kuchlari bilan to'p tepishmoqda. Albatta, har narsaning oxiri bo'lganidek, kun kelib futbolchi va murabbiylarning sabr kosasi to'ladi. Ahvol shu zaylda ketishini istashmaydi.

Navbahorning hozirgi ahvoli o'tgan mavsumdagi Gulistonni eslatmayaptimi? Sirdaryo jamoasi ham mavsumni Navbahor singari yuqori notada boshlab, asta quyiga sho'ng'igandi. Hozirgi tanglik jamoani birinchi liga tomon etaklashi hammaga malum. SHunday ekan, zudlik bilan oldinda turgan har qanday muammoni bartaraf etish lozim.

Uzunquloq gaplarga qaraganda, davralar oralig'ida jamoani Mansur Saidov, Baxtiyor Yoqubov, SHukurali Po'latov va boshqa futbolchilar tark etarmish. Aytish joizki, bu uch futbolchini Navbahorda uzoq qololmasligi avvaldan malum edi. Po'latov Bunyodkorga qaytsa, Yoqubov va Saidovlarni Farg'onaga qaytish ehtimoli yuqori. Bu hozircha tasdiqlanmagan malumot xolos.

Tark etuvchilar soni yana ko'payishi mumkin. Buni oldini olish uchun esa berilgan vadalar amalda o'z isbotini topishi lozim. Esingizda bo'lsa, oldinlari muxlislar bilan uchrashuvlarda klub rahbariyati yangi o'yingoh bitsa biz boshqa Navbahorni ko'rishimizni ko'p marta takidlashardi. Mana, shukrki o'yingohimiz bitdi. Ammo yuqoridagi so'zlar o'z isbotini afsuski topmayapti.

Yana va yana umid qilamizki, klubdagi vaziyat ijobiy tomonga o'zgaradi va jamoamiz biz kutgan o'yinlarni namoyish etadi!


Ulug'bek.