"Navbahor": SHartnomalar uzaytirildi

SHartnomasi yakuniga etgan futbolchilar bilan bitimlar muddatini uzaytirilayotganligidan ham barchani xabari bor. O'z navbatida jamoamizda ham shartnoma muddatlarini uzaytirish borasidagi ishlar amalga oshirilmoqda. Xususan, bo'lib o'tgan muzokaralardan so'ng Rahmatillo Berdimurodov, Otabek Valijonov, Alisher Samatov, Robbim Xasanov, Ilhom Boydedaevlar bilan shartnoma muddatlari uzaytirildi.

Demak, ushbu futbolchilar keyingi mavsumda ham aynan “Navbahor” sharafini himoya qilishadi. SHu kunlarda boshqa futbolchilar bilan ham shartnoma muddatlarini uzaytirilishi kutilmoqda. Bundan tashqari yakuniga etgan mavsumda jamoamiz sharafini himoya qilgan Azim Ahmedov, Botir To'raboev, Azam Alievlarning shartnomalari 2015 yilda ham amalda bo'lishini aytib o'tish joiz. O'z navbatida jamoani kuchaytirish va tarkibdagi raqobatni oshirish uchun yangi futbolchilarni jalb qilish ham rejalashtirilgan. Ochig'ini aytganda so'nggi yillarda “Navbahor”da dekabr oyida kamdan-kam hollardagina futbolchilar bilan shartnoma imzolanayotgandi. Xullas, jamoadagi vaziyat ijobiy tomonga o'zgarib tarkib o'zagini saqlash qolishga etibor qaratilmoqda. Bu hol navbatdagi chempionatda o'zining ijobiy natijasini berishi turgan gap.

Avval jamoa bosh murabbiyi Baxtiyor Ashurmatovni Namangan viloyat hokimi va klub rahbariyati bilan uchrashib bir qator masalalarni muhokama qilishi haqida malumot bergandik. Rejalashtirilgan uchrashuv bo'lib o'tganligini etirof etish joiz. O'zaro suhbat chog'ida echimini topishi lozim bo'lgan masalalar ko'rib chiqildi. Yaqin vaqt ichida barcha masalalarni ijobiy tarzda hal qilishga kelishib olindi. Bir so'z bilan aytganda qanday vaziyat bo'lishidan qatiy nazar Baxtiyor Ashurmatov kelgusi mavsumda ham “Navbahor” jamoasi bosh murabbiyi lavozimida faoliyat yuritadi.

So'nggi kunlarda farg'onalik futbolchilar – Mansur Saidov va Baxtiyor Yoqubovlarni “Neftchi” klubi safiga qaytishlari mumkinligi borasidagi gap-so'zlarni ko'payganligidan xabaringiz bor. Ushbu futbolchilarga chindanam “Neftchi”dan taklif tushganligini aytib o'tish joiz. SHu nuqtai nazardan olib qaraganda ular Farg'onaga qaytishlari ham mumkin.
Lekin, Saidov va Yoqubovlarni “Navbahor”da qolish ehtimoli ham yo'q emas. Bir so'z bilan aytganda ushbu futbolchilar bilan bog'liq masalaga hozircha to'la oydinlik kiritilganicha yo'q. Bundan biroz oldin jamoamiz azolari “Navbahor” markaziy o'yingohida o'tkazilgan bugungi mashg'ulotni yakunlashdi. Ertaga jamoamiz ikki mahal shug'ullanadi. Ertalab, jismoniy tayyorgarlikni mustahkamlashga qaratilgan yuklamali mashqlar bajarilsa, kunning ikkinchi yarmida esa asosan to'p bilan ishlashga qaratilgan mashqlarga etibor qaratiladi.