“Navbahor”: "Oq-tepa"ga yutqazdik, Doniyor Usmonov jamoadan ketdi

“Oq-tepa” jamoasiga qarashli maydonda bo'lib o'tgan uchrashuvning birinchi bo'limida hisob ochilmadi. Tanaffusdan keyin “Oq-tepa” jamoasi hisobni ochishga erishdi. Aynan ushbu gol o'yin taqdirini hal qildi. Uchrashuvni “Navbahor” quyidagi tarkibda o'tkazdi: Xurshid Xo'jaev, Yuriy Rijko, Bobir Akbarov, Alisher Samatov, Rahmatillo Berdimurodov, Alisher Mahmudov, Dilshod Jabborov, Otabek Valijonov, Sanat SHixov, Sunnatilla Mamadaliev, Mo'ydin Mamazulumov.
Zaxiradan maydonga tushganlar: Ilhom Boydedaev, Azim Ahmedov, Botir To'raboev, Timur Kagirov, Robbim Hasanov, Azamat Bobojonov, Muhammad Rasulov.

“Oq-tepa”ga qarshi uchrashuvda anchadan beri jarohat tufayli maydonga tusha olmayotgan Azim Ahmedov nihoyat maydonga qaytdi. Jamoaga moldovalik posbon Aleksandr Melenchuk taklif etilganligi bois o'tgan mavsumda “Navbahor” sharafini himoya qilgan Doniyor Usmonov bilan xayrlashildi. Usmonov navbatdagi mavsumni boshqa jamoa safida o'tkazadigan bo'ldi. Usmonovning keyingi faoliyatini muvaffaqiyatli kechishini tilab qolamiz.

Jamoa navbatdagi nazorat o'yinini 1 mart kuni Jizzaxning “So'g'diyona” klubiga qarshi o'tkazadi. Mazkur uchrashuvdan keyin Toshkent yig'ini yakuniga etadi. 4 martdan esa mashg'ulotlar Namanganda davom ettiriladi.

Mavsumga tayyorgarlikni Namanganda davom ettirayotgan yoshlar ham navbatdagi o'rtoqlik uchrashuvini o'tkazishdi.

Bu safargi o'yinda futbochilar “Qo'qon-1912” jamoasi yoshlari bilan kuch sinashishdi. “Navbahor-Umid” futbol maktabi maydonida bo'lib o'tgan uchrashuvda yoshlarimiz 2:0 hisobida g'alaba qozonishdi. G'alaba gollariga Azizbek Sayfiddinov (pen.) va Ilhom Alibaevlar mualliflik qilishdi. Yoshlar ertaga birinchi liga vakili “Yozyovon” jamoasi bilan mehmonda kuch sinashishadi.