"Navbahor": Odil Ahmedov yosh futbolchilar bilan uchrashdi

O'yingohdagi majlislar zalida o'tkazilgan uchrashuvda Namangan viloyat hokimi Xayrullo Bozorov, Namangan viloyat hokimligining Madaniyat va sport ishlari boshqarmasi boshlig'i Rasuljon Nizambaev, Namangan shahar hokimi, “Navbahor” futbol klubi prezidenti Bahodir Bekxodjaev, “Navbahor” futbol klubi vice-prezidenti Olimjon Qosimov va OAV vakillari ham qatnashishdi. Uchrashuv avvalida Namangan viloyat hokimi so'zga chiqib, yosh futbolchilarga kelgusida mamlakatimiz futbolida o'z o'rinlariga ega bo'lish uchun tinmay mehnat qilish lozimligi haqida gapirib, ular uchun barcha shart-sharoitlar yaratilayotganligini alohida etirof etdi. Kelgusida yosh avlod vakillarini futbol bilan munosib tarzda shug'ullanishlari uchun yangi-yangi sport inshootlarini barpo etilishini malum qildi
Uchrashuvda Namangan viloyat faxri bo'lgan Odil Ahmedovga Namangan shahrida faoliyat yuritayotgan 15-sonli futbol maktab-internati va “Navbahor-Umid” futbol maktabining iqtidorli tarbiyalanuvchilari o'zlarini qiziqtirgan savollari bilan murojaat qilishdi. Odil Ahmedov faoliyati davomida ro'y bergan qiziqarli voqealar haqida gapirib berdi. Uchrashuv so'nggida Ahmedov maydonga chiqib, yosh futbolchilarga to'p bilan ishlashdagi mahoratini namoyish etdi.