"Navbahor-Farm" murabbiyi: "Bizda hech qanday kamchilik yo'q"

- O'yin shiddatli bo'ldi. Bugun hisobni ochgan bo'lsak-da, raqibimiz «Dinamo» ikkinchi bo'lim yakunigacha ustunligini ko'rsatdi. Sababi Samarqand jamoasi tarkibi Superligaga mos, tajribali o'yinchilardan tashkil topgan. Keyingi o'yinlarda g'alaba qozonishga intilamiz. SHunga qaramay, bugun munosib qarshilik ko'rsata oldik, deb o'ylayman. Tomoshabop o'yin bo'ldi.

- O'yin oldidan «Navbahor-Farm» jamoasidagi moliyaviy muammolar, klubdagi sharoitlar og'irligi haqida xabar tarqalgandi. Bu masalada o'zgarishlar bo'ldimi, muammolar bartaraf etildimi?

- Endi bu, nima deydi, bizga qorong'u masala. Jamoadagi ichki muhit yaxshi, endi jurnalistlar xohlagan narsasini yoritadi, nima yozsa, ularni o'zi javob beradi. Lekin jamoada muhit yaxshi, hech qanday kamchilik yo'q. Rahbariyat qo'ldan kelgancha bizga sharoit qilib berayapti. Hammasi yaxshi, rahbariyatga hech qanday shikoyat yoki etirozimiz yo'q. Ha, kamchilik bo'ladi, ammo hammasi sekin-asta bartaraf etiladi. Xalqni og'ziga elak tutib bo'lmaydi, kimdir nimadir degan bo'lsa, o'sha javob beradi. Bu bizga qorong'u masala. 

- Bosh murabbiy Rashid G'ofurovning matbuot anjumaniga chiqmagani nima bilan bog'liq?

- Bosh murabbiyimizning mag'lubiyat va o'yindagi jiddiy jarohatdan kayfiyatlari yo'q. O'sha o'yin boshida jarohat olgan futbolchi u kishining o'g'illari bo'ladi. Tez tibbiy moshinasida olib ketildi. Baribir hamma ota ham farzandining salomatligidan xavotir oladi. SHu bois o'rnilariga matbuot anjumaniga men chiqdim, - deydi «Navbahor» murabbiyi uchrashuvdan keyin.