"Nasaf"ni chempion qilgan o'yinlar

Buni bemalol katta tarixiy yutuq desa bo'ladi. Va aytish mumkinki, "Nasaf" bu mavsum bir necha yillik mehnat samarasini ko'rdi.

Har bir chempionlik tagida katta mehnat yotadi va buni inkor etib bo'lmaydi. Ayniqsa bu yil jamoalar o'rtasidagi raqobat kuchaygani hamda jamoalarning kuch tomonlama deyarli tenglashgani "Nasaf" foydasiga o'ynadi. SHuning uchun bo'lsa kerak, eng avvalo o'zaro raqobatchilar bilan o'yinlarda qo'lga kiritilgan yutuqlar "Nasaf"ning mavsum tugashiga uch tur qolganida chempionlikni rasmiylashtirishiga sabab bo'ldi.

Xo'sh, bu mavsum yana kimlar bosh sovrin uchun harakat qildi? Albatta, "Paxtakor", OKMK va "Navbahor". Lekin shunday bo'ldiki, bu uch jamoa butun mavsumni bir tekis o'tkaza olmadi. Masalan, o'tgan yilgi chempion "Paxtakor" bu mavsum tarkib borasida bir nechta muammolarga duch keldi. Klub chempion tarkibni yig'a olmadi, qolaversa jamoa etakchisi Dragan CHeranning jarohat olib, bir nechta o'yinlarda maydonga tushmagani ham o'z tasirini ko'rsatdi. Jamoada aynan CHeranning o'rnini yopa oladigan futbolchi yo'qligi pand berdi.

OKMK tarkibni yoshartirish ustida ish olib bordi, jamoani ko'plab futbolchilar tark etdi, biroq bu chempion bo'lish natijasini bermasdi. Kelasi mavsum yanada kuchliroq OKMKni ko'rsak ajab emas. Yil boshida "Navbahor" oldiga ham chempionlik vazifasi qo'yilgandi. Kuchli tarkib yig'ildi, biroq bir nechta bahslarda muhim ochkolar boy berildi. Qolaversa Samvel Babayan ketgach, jamoada g'oliblik ruhi yo'qolib qoldi. Xullas asosiy raqobatchilarning turli sabablar bilan chempionlik uchun kurasha olmasligidan foydalangan "Nasaf" o'z o'yinlarini xotirjam o'tkazib kerakli ochkolarni qo'lga kiritdi.

Kuchlilar bilan o'zaro o'yinlar

SHu o'rinda chempionlik uchun kurashda "Nasaf"ga raqobatchilik qilgan jamoalar bilan qayd etilgan natijalarni yodga olsak. Agar chempionlik yo'lida chin manoda OKMK jiddiy raqobat qildi deb hisoblasak, "Nasaf" har ikkala o'yinda ham Olmaliq jamoasini mag'lub eta oldi. Bundan tashqari, "Navbahor" bilan o'zaro o'yinlarda ham 6 ochko qo'lga kiritildi. Jamoa bu mavsum "Paxtakor"ga yutqazmadi: safarda durang va uyda g'alaba. SHuningdek, o'z maydonida "Neftchi" mag'lub etilishi ham katta rol o'ynadi.

2-tur. "Paxtakor" - "Nasaf" 0:0
15-tur. "Nasaf" - "Paxtakor" 1:0

5-tur. "Nasaf" - "Navbaxor" 3:2
18-tur. "Navbaxor" - "Nasaf" 0:1

6-tur. AGMK- "Nasaf" 3:4
19-tur. "Nasaf" - AGMK 2:0

"Nasaf"ga chempionlik yo'lida ayniqsa 19-turda bo'lib o'tgan bahs muhim rol o'ynadi. Jamoa shu kuni o'z maydonida OKMKni qabul qilib, 2:0 hisobida zafar quchdi va chempion bo'lish sari dadil qadam tashladi. Taxminimizcha, aynan Qarshida bo'lib o'tan bellashuvdan so'ng Olmaliq jamoasi chempionlik yo'lidagi harakatni to'xtatdi.

To'g'ri, undan keyin uyda "Lokomotiv" mag'lub etildi, biroq keyingi turlarda "So'g'diyona" va "Metallurg" bilan durang hamda "Neftchi"ga imkoniyat boy berilishi OKMK imkoniyatlarini pasaytirib yubordi. "Nasaf" esa "Loko" bilan o'yinda kichik hisobda g'alaba qozonib, chempionlikni rasmiylashtirdi, xolos. Biroq jamoa o'z maydonida Olmaliq klubini mag'lub etganidan so'ng deyarli 90 foizga chempionlikni hal qilib bo'lgandi.

Mustahkam murabbiylar shtabi

Har qanday jamoaning chempion bo'lishida murabbiylar shtabi kimlardan iborat ekanligi va yil bo'yi qanday ishlagani muhim rol o'ynaydi. Ro'ziqul Berdievning "Nasaf" bosh murabbiyi sifatida ish boshlaganiga o'n yil oldin oshdi. Bu orada Kubokda g'alaba qozonildi, Superkubok qo'lga kiritildi, faqat klub muzeyiga chempionlik sovrini etmayotgandi.

Ro'ziqul Berdiev o'z jamoasi va jamoa imkoniyatlarini besh qo'ldek biladi. O'z atrofiga ham ishdan qochmaydigan murabbiylarni yig'gan deya olamiz. Masalan, SHuhrat Toshpo'latov o'z paytida Ro'ziqul Berdiev bilan o'ynagan hamda bosh murabbiy xayolidan nima o'tayotganini tezda o'qiy oladi. Jismoniy tayyorgarlik bo'yicha murabbiy Ilnur Sibagatullin bir necha yil "Mashal"da faoliyat olib bordi, hozir esa "Nasaf"da ishlab kelmoqda. Ilnur Raupovich ham o'z ishining ustasi, u futbolchilarni o'yindan keyin qanday tiklash va jismoniy tomonlama bo'lajak bahslarga tayyorlashni puxta biladi.

Bundan tashqari "Nasaf" darvozaboni Abduvohid Nematovning shu darajaga etishida davrzabonlar murabbiyi Asliddin Hasanovning qo'shgan hissasi ham katta bo'ldi. Va bemalol aytishimiz mumkin, Abduvohid bu yil o'zining eng yaxshi mavsumini o'tkazdi va bemalol nafaqat eng yaxshi darvozabon, balki mavsumning "Eng yaxshi futbolchisi" bo'lishga ham to'liq haqli.

Ro'ziqul Berdievga shuningdek, klub sport derektori Sergey Kucherenko, texnik direktor Botir Qoraev, yosh murabbiy Davron Karimqulov, shuningdek shifokor Maruf Berdiev, massajchilar Hamza Mavlonov bilan Andrey Bezborodov, jamoa mamuri Alisher Turdiqulov va albatta klubning matbuot va media bo'limi katta yordam berdiki, bularsiz chempionlikka erishish nihoyatda mushkul edi. Va albatta, muxlislar va rahbariyatning qo'llab-quvvatlashi ham muhim rol o'ynadi.

O'zgarmas jamoa o'zagi

"Nasaf" bir necha yildan beri o'zgarmas tarkib bilan harakat qilib kelayotgan bo'lsa-da, aslida ko'p futbolchilar almashadi. Faqat bu global tarzda amalga oshirilmagani bois bazan sezmay qolamiz. To'g'ri, "Nasaf" yoppasiga tarkibni almashtirmaydi. Bu borada Ro'ziqul Berdiev juda ehtiyotkorlik bilan "etti o'lchab bir kes" qabilida ish tutadi. Ayniqsa jamoaga yangi futbolchini qo'shib olish chog'ida murabbiy o'ta jiddiy yondashadi. Legionerlar tanlovi borasida ham shu fikrdamiz. "Nasaf" legionerlarni tavakkal tanlamaydi va ko'p hollarda "Nasaf"da o'ynagan xorijliklar keyinchalik boshqa klublarga yo'l oladi.

"Nasaf"ning chempion bo'lishida klub akademiyasining roli ham katta. Bilamizki, bir necha yildan beri "Nasaf" futbol maktabi barqaror ishlab kelyapti. Ukrainalik mutaxassis Sergey Kucherenkoning futbol maktab rivojiga ko'p mehnati singgan. Bu insonni klubda kimdir yoqtirib, kimdir yoqtirmasligini eshitganmiz, biroq haqiqat shuki, Kucherenko kuchli mutaxassis va endilikda klub sport direktori sifatida "Nasaf" rivojiga o'z hissasini qo'shib kelmoqda.

Ro'ziqul Berdievda bitta odat bor, u futbolchilarni almashtiradi, tarkibni yangilaydi, lekin jamoa o'zagini imkon qadar uzoq vaqt saqlab qolishga harakat qiladi. Jamoa o'zagi bu - umurtqa pog'onasi degandek gap. Agar umurtqa pog'onasi bo'lmasa, biz gavdamizni tik tutib yura olmaymiz. Futbolda ham shunday. Jamoaning o'zagi bo'lmasa, g'alaba qozonmaysiz. CHempionlikni orzu qilish shunchaki xomxayol bo'lib qoladi. SHu bois ham Berdiev jamoa o'zagini saqlab qolgan holda faqat atrofini yangilab turadi.

Rahbariyat va muxlislar etibori

Qashaqadaryoda futbolni juda sevishadi. "Nasaf" esa voha ahli uchun shubhasiz birinchi raqamli jamoa hisoblanadi. Bir paytlar ustoz sharhlovchi Husan aka Temirov efir payti ko'p bora takrorlardilar: "Bugun "Nasaf"ning o'yini ko'rish uchun stadionimizga qo'shni tumanlardan, xususan CHiroqchi, Dehqonobod, Koson, Kasbi, Qamashi, Yakkabog', G'uzor va Kitobdan ham ko'plab muxlislar kelgan".

Ha, shunday. "Nasaf"ning o'yinini ko'rish uchun odamlar erinmay qo'shni tumanlardan boradi. Viloyatning deyarli 80 foizi "Nasaf"ga muxlislik qiladi desak xato bo'lmaydi. Bundan tashqari, klub rahbariyati ham doim etibor berib kelmoqda. Qashqadaryo viloyatining hozirgi hokimi Murotjon Azimov, "SHo'rtangazkimyo" majmuasi rahbari hamda klub prezidenti SHuhrat Aslanov bir necha bor "Nasaf" futbolchilari bilan uchrashgani haqidagi xabarlarga tez-tez ko'zimiz tushadi.

"Nasaf"ning shu darajaga etishida birlamchi navbatda marhum Nuriddin Zaynievich Zaynievning qo'shgan hissasi juda katta bo'lgan. Bu insonni bemalol zamonaviy "Nasaf" futbol klubi asoschisi deya olamiz. Bundan tashqari bir necha yil davomida "SHo'rtangazkimyo" majmuasiga rahbarlik qilgan Alisher Sultonov say-harakatlari bilan klub tizimi va infratuzilmasi ancha rivojlanib, zamonaviy ko'rinishga keltirildi. SHuningdek, taniqli menejer Bahrom Davlatov faoliyat olib borgan yillari klubda to'g'ri tizim yo'lga qo'yilib, "Nasaf"da yangi davr boshlandi.

Xullas, "Nasaf" chempion bo'lishi o'z-o'zidan sodir bo'lib qolgani yo'q. Klub bu yo'lda yillab harakat qildi va buning eng katta mevasini 2024 yilga kelib ko'rdi. SHu o'rinda saytimiz o'quvchilari nomidan "Nasaf"ni yana bir bor chempionlik bilan tabriklab, endigi maqsad Osiyo chempionlar Ligasida g'alaba qozonish deb qolamiz.

X.Xoliqov.