"Nasaf" Muborakda ham gol o'tkazmasdan g'alaba qozonish seriyasini davom ettira oladimi?

16:00 - “Mashal” (Muborak) – “Nasaf” (Qarshi)

Hakamlar: I. Tantashev (Buxoro), H. SHodmonov (Buxoro), A. Qo'ldoshev (Buxoro), F. Norsafarov (Qarshi).

Nazoratchi: S. Najafaliev (Toshkent).

PFL vakili: B. Haydarov. 

Demak, bugun Muborak shahridagi Bahrom Vafoev nomli stadionda voha derbisi kuzatiladi. Turnir jadvalining 8-pog'onasida borayotgan "Mashal" ikkinchi o'rin uchun kurashayotgan "Nasaf"ga qarshi bahs olib boradi. 

Ikkinchi davrada hozircha to'rtta g'alabaga erishgan "Mashal" oxirgi turlarni yaxshi o'tkaza olmadi. Jamoa safrada "Qo'qon-1912"ni mag'lub etib qaytganidan beri keyingi to'rtta uchrashuvda g'olib chiqmadi. "Mashal" o'z maydonida ikki bor durang o'ynagan bo'lsa, safardagi ikkita bellashuvda yutqazib qo'ydi. 

Bilasizmi? "Mashal" o'z maydonida "So'g'diyona" va "Buxoro" bilan durang qayd etdi. Bu jamoa oxirgi marta 20-turda Muborakda zafar quchgan va o'shanda "gazchilar" "Navbahor"dan 2:1 hisobida ustun kelishgan. 

Fakt: "Nasaf"ga qarshi Qarshidagi bellashuvda muborakliklar 0:1 hisobida yutqazib qo'yishgan. O'tgan yil Muborakda kechgan uchrashuvda esa "Mashal" raqibini 1:0 hisobida mag'lub etgan. 

"Nasaf" haqida to'xtaladigan bo'lsak, bu jamoa ikkinchi o'rin kurashmoqda. CHempionlikka imkoniyat yo'qligi bor gap, chunki buyog'iga "Lokomotiv" peshqadamlikni aslo topshirib qo'ymasa kerak. Lekin "Nasaf" ikkinchi o'rinni oladigan bo'lsa, bu ham qarshiliklar uchun katta yutuq bo'ladi. "Nasaf" oldida bir qator muhim o'yinlar turibdi va shulardan biri bugun o'tkaziladi. 

Bilasizmi? "Nasaf" ikkinchi davrada juda chiroyli o'yin namoyish etmoqda. Buni murabbiy va mutaxassislar ham bot-bot takidlashyapti. "Nasaf" oxirgi ettita o'yinni gol o'tkazmasdan o'z foydasiga hal etdi va buni judayam yaxshi ko'rsatkich desa bo'ladi. 

Fakt: "Nasaf" o'z maydonida "Bunyodkor"ga mag'lub bo'lganidan beri keyingi bahslarning hammasini g'alaba bilan yakunladi. Bundan tashqari, jamoa oxirgi ikkita o'yinida bir xil 3:0 hisobida g'alabaga erishdi. "Neftchi" - "Nasaf" 0:3, "Nasaf" - "Dinamo" 3:0. 

Agar bugun "Mashal" g'alaba qozonsa yoki gol urishning uddasidan chiqsa, "Nasaf"ning ketma-ket ettita o'yinlik seriyasiga barham beradi.