Muzaffar Muzaffarov: "Neftchi" ikkinchi davrada haqiqiy shou ko'rsatadi"

"Toshkentda ikkinchi davraga jiddiy tayyorlanyapmiz. Xabaringiz bor, davralar oralig'ida tarkibda bir qator jiddiy o'zgarishlar yuzaga keldi. Yangi futbolchilar borasida ijobiy fikrdaman. Ularning jamoamizga katta foydasiga tegadi. Yig'in davomida bir qator foydali bo'lgan o'rtoqlik bahslarida ishtirok etmoqdamiz.  

Og'ir yuklamali mashg'ulotdan so'ng o'yinlarda ishtirok etish futbolchidan katta murakkablikni talab etadi. SHu bois, "Qizilqum" bilan bahsda to'liq imkoniyatlarimizni ishga sola olmadik deb o'ylayman. "Qo'qon-1912" bilan bahsda esa o'zimiz istagandek o'yin ko'rsatdik. Vadim Karlenovich bizga o'z futbol falsafalarini singdirib bormoqda. Murabbiy istagan o'yinni aynan qo'qonliklarga qarshi bellashuvda namoyish eta oldik degan fikrdaman. O'yindan zavq oldik.  

Bosh murabbiyimiz takidlaganidek, "Neftchi" ikkinchi davrada haqiqiy shou ko'rsatadi. Diqqat etiborimiz "Bunyodkor" bilan bahsga qaratilgan. O'zbekiston Kubogida hali imkoniyatlarimiz yomon emas. 

Ochig'i, birinchi davradan so'ng jamoadan ketmoqchi edim. Oldimda 5-6 ta klubdan aniq takliflar mavjud edi. Ular ichidan 2 tasi Toshkent jamoalaridan bo'ldi. Lekin Vadim Abramov va klub rahbariyati bilan suhbatdan so'ng jamoada qolishga qaror qildim", - dedi Muzaffarov 

Hojiakbar Jabborov suhbatlashdi