Muzaffar Muzaffarov: “Navoiydagi o'yin menga juda yoqdi”

-  Dastlab o'yin borasidagi fikrlaringiz bilan o'rtoqlashsangiz?
-  “Qizilqum”ga qarshi bahsga jiddiy xozirlik ko'rdik. Raqib  nomdor va tajribali o'yinchilarga ega ekanligi barchamizga yaxshi malum. SHunga qaramay, o'tgan turdagi g'alabadan ruhlangan holda safarga uch ochko niyatida bordik. Tezkor gol urishga erishdik va bo'lim oxirida ham navbatdagi golga egalik qilik. Xattoki, navoiylik muxlislar ham g'alabamizga shubha qilmagandi desam mubolag'a bo'lmaydi. O'yin menga juda yoqdi. Yigitlar Navoiyda o'tgan uchrashuvlarga nisbatan yaxshi harakatlanishdi. Biroq ikkinchi bo'limda g'alabani saqlab qola olmaganimiz yoqimsiz bo'ldi. 

-  “Qizilqum” Navoiyda juda kuchli o'yin namoyish etadi.  O'yin boshida kiritilgan tezkor gol va umuman mazkur omadli start haqida nima deysiz?
- Futbolchi uchun gol urish eng yoqimli holat sanaladi. Tezkor gol urib jamoaga foydam tekkanidan xursandman. To'g'risi o'yinni kechroq vaqtga qo'yilgani sababli yigitlar ham bellashuvdan zavq olib harakat qilishdi. CHunki uchrashuv vaqti futbol o'ynash uchun juda qulay vaqtga belgilandi. “Obod” bilan Farg'onada kechgan so'nggi uy o'yini juda erta vaqtga to'g'ri kelgandi. SHu sabab, o'yinimiz chiqmagandi. Endi “Navbahor” bilan bahsni qulay vaqtga belgilashadi deb umid qilaman.

-  "Neftchi” jamoasi 23 may kuni Farg'onada “Navbahor”ga qarshi navbatdagi derbida ishtirok etadi. Uchrashuvdan nimalar kutyapsiz?
-  “Neftchi”ning maqsadi bitta – hamisha g'alaba qozonish! Ha, namanganliklarga qarshi bellashuv ham qizg'in o'tishi aniq. Hali muxlislarni stadionga qaytaramiz. Men bunga ishonaman, - Muzaffarov.

“Neftchi” matbuot xizmati