Muxtor Qurbonov: "Sergeevning o'rniga yuguradigan futbolchini o'ynatish kerak"

"Bunyodkor" stadionida kechadigan bahs soat 20:00da boshlanadi. Hozir barchamizning etiborimiz mana shu bahsga qaratilgan desak mubolag'a bo'lmaydi. Bugungi o'yindan so'ng jahon chempionatiga borish-bormaslik masalasi deyarli hal bo'ladi. 

Muxlislarimiz bugun faqat va faqat g'alaba kutishmoqda. SHundagina biz uchun jahon chempionati eshiklari ochiladi. Yaqin o'tmishning mohir yarim himoyachilaridan biri Muxtor Qurbonov "Futbol Ekspress" gazetasiga bergan intervyusida bugungi o'yin oldidan o'z fikrini aytib o'tdi: 

- "Janubiy Koreya 5-10 yil oldingi jamoa emas. Ular bilan hozir bemalol o'ynasa bo'ladi. Agar Samvel Babayan oxirgi o'yin uchun tarkib tanlashda adashmasa va hadeb Sergeevga o'xshaganlarni maydonga tushiravermay, jon kuydirib yuguradiganlarni o'ynatsa natija bo'lishiga ishonaman. Bu oxirgi o'yin va oxirgi imkoniyat. Har bir futbolchi jonini berib o'ynashi shart". 

SHuningdek, Muxtor Qurbonov safarda Xitoy bilan bo'lgan bahs haqida ham fikr bildirdi: 

- "Xitoy bilan o'yinda yana tarkib tanlashda xatolik bo'ldi. Igor Sergeevning o'rniga boshqa futbolchilar ham bor edi. Masalan, Ivan Nagaevni chaqirishsa bo'lardi. Baribir bitta tarkibni hadeb o'yinga tushiravermasdan chiqmagan jondan umid deya bir-ikkita o'zgarishlarni qilib turish kerak. SHundagina umid qilsa bo'ladi".