Murod Ismoilov: "Ikki mag'lubiyatdan so'ng ortga yo'l yo'q edi"

"Paxtakor" va "Nasaf"ga qarshi uchrashuvlardan keyin jamoamizda ozgina tushkun kayfiyat mavjud edi. "Andijon"ga qarshi bahsga juda puxta tayyorgarlik ko'rdik. "Andijon" jamoasi ham avvalgi mag'lubiyatdan keyin derbiga yaxshi tayyorgarlik ko'rganliklari aniq edi. O'yindan avval yo'qotishlarga ega edik.

Baxtiyor Yoqubov, Javohir Rasulov va SHukurali Po'latovlar bugun maydonga tusha olmadilar. Xudoga shukr, bugun jamoamizning tajribali (faxriy) o'yinchilari judayam chiroyli o'yin namoyish etishdi. Ularning hali aytadigan so'zlari bor edi va biz ulardan kerakli paytda foydalanishga erishmoqdamiz.

"Andijon" ham bizga etarlicha qarshilik ko'rsatdi. Keyingi o'yinlarda "Andijon" jamoasiga omadlar tilayman. Biz ham to'xtab qolish niyatimiz yo'q. Keyingi "Olmaliq"qa qarshi bahs uchun tayyorgarlikni boshlashimiz kerak. 

Aytib o'tganimdek, avvalgi ikki mag'lubiyatdan keyin orqaga yo'l yo'q edi. SHogirdlarim ham masuliyatni his qilib turgan edilar. Avvalgi mag'lubiyatlar uchun rahbariyatimiz va muxlislarimiz oldida judayam xijolatda edik. Bugungi g'alabada etakchi o'yinchilarimiz Mansur Saidov va Akmal Xolmatovlar asosiy rolni o'ynadilar deb bemalol aytaveraman. Uchrashuv boshidan jarohatidan endigina forig' bo'layotgan Ro'zimboy Ahmedov va SHerzod Hakimovlarni tushirdim. Bu o'ylagan qarorlarimiz bugun o'zini 100% oqladi deb o'ylayman. Juda havas qildimki, "Andijon" muxlislari jamoasi yutqazayotgan bo'lsalar ham qo'llab-quvvatlashdan to'xtamadilar. Bu ishni hamma joyda ham qila olishmaydi. "Andijon" muxlislariga va bizni qo'llab-quvvatlagan sodiq muxlislarimizga kattakon rahmat. 

Bizning asosiy maqsadimiz, har bir o'yinda muxlislarimizni xursand qilish. Muxlis o'yinni ko'rish uchun 2-3 soat vaqtini ajratadi. SHu vaqt davomida biz ularga bir olam quvonch baxsh eta olishimiz kerak. Bugungi chiroyli o'yinimiz orqali muxlislarimizni xursand qildik deb o'ylayman.

Inson bajara oladigan narsasinigina vada berishi kerak. Aqli etgan inson vada berishi kerak. Vada berdimi uni bajarishi shart! Avvalgi yili jamoamiz 9-o'rinni egallagan edi. O'tgan yili "Futbol SHarhi" ko'rsatuvida vada berib qo'yib bir yil davomida qiynaldim. 8-o'rinni egallashimiz oxirgi turlargacha aniq emasdi. Erkak kishi gapiga javob berishi kerak. Har bir o'yinda muxlislarga yoqadigan o'yin namoyish etishga vada beraman.

Komiljon Ikromov