Mundial oldidan. Xurshid G'iyosov: "Maydonda birinchi raqamli jamoa bo'lamiz"

Ketish oldidan futbolchilarimiz saytimizga fikrlarini bildirib o'tdi.

"Mana shu jahon chempionatida ishtirok etayotganimizdan juda ham xursandmiz. Osiyo chempionatida ham buni qo'lga kiritish oson bo'lgani yo'q. Har bir futbolchi bunday futbol bayramida ishtirok etishni orzu qiladi. Nasib bo'lsa yaxshi o'rinlar bilan yurtimizga qaytishga harakat qilamiz", - deydi Xurshid G'iyosov.

- Jahon chempionatiga tayyorgarlikdan ko'nglingiz to'ldimi? Qanchalik tayyorman deya olasiz?

- Ketma-ket tashkil etilgan shuncha yig'inlardan so'ng juda ham yaxshi tayyorganlik ko'rdik. Xorijda tashkil etilgan yig'inlar va nazorat o'yinlarida imkoniyatlarimizni baholab oldik. Qanchalik tayyor ekanligimizni endi maydonda ko'rsatgan o'yinimizdan bilib olamiz. Portugaliya, Urugvay yoshlari bilan bo'lgan o'yinlar juda katta ahamiyatga ega bo'ldi. Guruhda raqiblarimiz kuchli va bu o'yinlarni har biriga alohida ko'rsatma bilan maydonga chiqamiz.

- Yoshlar terma jamoasi jo'nab ketish oldidan murabbiylar va rahbariyat jamoa oldiga aniq bir vazifani qo'ydimi?

- Har bir jamoa chempionatda kubokni olish uchun boradi. Biz ham shu maqsadda boramiz.

- Bunga imkoniyatimiz etadimi?

- Nega etmaydi? Albatta etadi ! Bizni yoshlar ham hech kimdan kam emas. Biz himoyaviy o'yin ko'rsatmaymiz va birinchi raqamli jamoa bo'lamiz. Maqsadim mana shu jahon chempionatidan so'ng O'zbekistonga yorug' yuz bilan qaytishdir.