Mirjalol Qurbonov: “Olimpik” bilan durang adolatli bo'ldi”

“Biz “Olimpik” jamoasini yaxshi ekanligini bilardik. SHuni hisobga olgan holda, o'yinga astoydil tayyorgarlik ko'rdik. Raqibimiz yosh va iqtidorli futbolchilar hisobiga tashkil qilingani bilindi. Ularda ko'plab vaziyatlar yuzaga keldi. Darvozabonimiz ham ko'p vaziyatlarda jamoamizni gollardan asradi. Bir so'z bilan aytadigan bo'lsam, ushbu o'yinda g'alaba qozonishimiz yoki yutqazishimiz ham mumkin edi. Durang adolatli bo'ldi deyish mumkin", - deydi Qurbonov. 

- Saidjamol Davlatjonovni chetlatishi “Xorazm”ga so'nggi daqiqalarda qanchalik muammolar keltirdi?
- Albatta, chetlatishdan so'ng “Olimpik” yanada ko'proq hujum uyushtirdi. Ular g'alaba qozonish uchun bor kuchlari bilan harakat qildi. Bir kishi kam bo'lib qolganimizdan kelib chiqib, himoyaga ko'proq etibor qaratdik.

- “Xorazm” mavsumning qolgan o'yinlarida o'z oldiga qanday maqsadlarni qo'ygan?
- Aslida mavsumni yuqori o'rinlarning birida tugatish vazifasi qo'yilgan edi. “Oq-tepa” hamda “Istiqlol”ning musobaqadan erta chiqib ketishi, bizning maqsadlarimizga o'z tasirini ko'rsatdi. Bizdan ham olti ochko olib tashlandi. SHu tufayli, qolgan o'yinlarda g'alaba qozonishimiz va o'zimiz uchun kerakli ochkolarni jamg'argan holda, mavsumni beshlikda tugatmoqchimiz.

- Klubning bugungi kundagi moliyaviy holati xususida nimalarni ayta olasiz?
- Moliyaviy holatimiz chakki emas. Klubda maosh o'z vaqtida berilmoqda. Rahbariyat shu tomondan futbolchilarni qo'llab-quvvatlamoqda va amaliy yordamini berib bormoqda.