Mirjalol Qosimov: "Xorazm" maydoni ko'proq havaskorlar kelib o'ynasa bo'ladigan maydonga o'xsharkan"

O'yindan keyingi matbuot anjumanida ishtirok etgan olmaliqliklar bosh murabbiyi Mirjalol Qosimovning fikrlari quyidagicha bo'ldi: 

- Qiyin g'alabaga erishdik. O'yin tomonlama emas, maydon holatidan ko'proq qiynaldik. Birinchidan, suniy maydon. Ikkinchidan, xuddi betonga o'xshab juda qattiq ekan. SHaxsiy fikrim, bu kabi maydonlarda ishdan keyin kechki payt havaskorlar kelib, shunchaki dam olish uchun to'p tepib tursa bo'ladi. Lekin professional futbolchilarni bunday maydonlarda o'ynatish kerak emas. Ayniqsa, Superliga va Proliga jamoalari o'ynaydigan stadionlar yaxshi holatda bo'lishi kerak. 

- "Xorazm" haqida fikringiz? 

- "Xorazm" uy uchrashuvlarini shu stadionda o'tkazgani bois o'z maydonini juda yaxshi biladi. Ular bejizga "Andijon"ni mag'lub etgani yo'q. Yutganimizdan xursandman. Muhimi, o'yinni jarohatlarsiz tugatib oldik. Endi "Zomin" bilan bo'ladigan bellashuvga tayyorgarlik ko'ramiz. "Xorazm" klubiga omad tilayman.

- AGMK Superliga turnir jadvalida yuqori o'rinlarda bormayapti. Bu nima bilan bog'liq deb o'ylaysiz? 

- Mavsumning birinchi o'yinida nimalar bo'lganini hamma ko'rdi. Ikkita qizil kartochka va boshqa sabablar tufayli yutqazib qo'ydik. Hozir esa sekin-asta o'zimizni o'nglashga harakat qilyapmiz va tez orada kuchlilar safiga qaytamiz deb umid qilaman. Har bir o'yindan to'g'ri xulosa chiqargan holda keyingi uchrashuvga hozirlik ko'ryapmiz.