Mirjalol Qosimov: "Bugun ochiq futbol guvohiga aylandik"

O'yin haqida

- Bugungi o'yin uchun har ikki jamoaga rahmat aytgan bo'lardim. Futbolchilar noqulay ob-havoga qaramasdan muxlislarbop o'yin namoyish etib bera olishdi. Muxlislarga ham rahmat, ular bizni oxirigacha qo'llab-quvvatlashdi. G'alaba har doim quvonarli, lekin tarixga aylandi. Biz navbatdagi uchrashuvlarga tayyorgarlikka kirishamiz.

- Jamoaning bugungi va "Lokomotiv"ga qarshi o'yinini taqqoslasak, futbolchilar bugun yorqinroqdek ko'rinishdi. Bu haqida fikringiz?

- Taqqoslaydigan bo'lsak, "Lokomotiv" himoyaviy uslubga ko'proq urg'u qaratdi va markazda uch himoyachi bilay o'ynadi, shuningdek uzun paslarni ko'p ishlatdi. SHuningdek, o'sha o'yin kurashlarga boy o'tdi. Bunday uslubda o'yin boshqacharoq tus oladi. "So'g'diyona" ko'proq mayda va o'rta uzatmalar bilan o'ynadi. Doriev, 8 va 11-raqamli o'yinchilar to'p bilan yaxshi muomala qilishdi. SHuningdek, bugun ochiq futbol bo'ldi.

- Oybek Rustamovning maydondagi joylashuvi o'zgargach jamoangiz g'alabaga erishdi. Bu borada fikringiz qanday?

- Bu sabab emas. 2:0 hisobida g'alaba qozonayotganimizda juda oson gollar o'tkazib yubordik. Futbol shunaqa, bitta vaziyat o'yinni o'zgartirib yuborishi kerak. 2:0 payti hujum qilganimizda ilk golni qarshi hujumdan qabul qilib oldik, ikkinchisini standartdan, uchinchisi esa yana penaltidan.

- Bugungi o'yin yomg'ir ostida o'tdi. SHu sabab to'p uzatishlarda xatoliklar kuzatildi. Bunaqa vaziyatlarda futbolchilarga qanday ko'rsatmalar beriladi?

- Beayb parvardigor, hamma ham xato qiladi. Futbolda bitta kichkina xato ham kechirilmasligi mumkin, bu shaxmat emas. To'pni egallashdan oldin keyingi harakatni o'ylab qo'yish kerak. Bu kabi ob-havo hukmron bo'lgan o'yinlarda to'p nazorati muhim ahamiyat kasb etadi.