"Milan" afsonasi Paolo Maldini bilan intervyu

Paolo Maldini, Franko Barezi va Alessandro Kostakurta kabi futbolchilar sodiqlik namunasi bo'lib xizmat qilishgan. Paolo 24 yillik faoliyati davomida 26 sovringa ega chiqqan. U faoliyatini tugatgandan keyin jamoa faqat bir bor chempionlikka erishdi.

- Hozir bir joyda ko'p o'ynash oson emas. Men Milanda tug'ildim va qadrdon klubim bilan barcha muvaffaqiyatga erishdim. Hozir bundaylarni kamdan-kam uchratasan. Har kimning o'z maqsadi bor. O'ynashni boshlaganimda italiyalik futbolchilar boshqa mamlakatga ketishni xohlashmasdi. Endi bu odatiy qabul qilinadi. Menimcha, to'g'ri odamlar to'g'ri klubga duch kelsa, bundan ajoyib narsa chiqadi. “Milan”da butun faoliyatini o'tkazgan ko'plab o'yinchilar bo'lgan. Bizga osonroq edi, chunki g'alaba shukuhi shunchalik yashardiki, hech kim jamoani tark etishni istamasdi, - deb takidladi Paolo.

- Maldinining futbolda uzoq yil faoliyat ko'rsatishi siri nimada?

- Ota-onamning kelib chiqishida. Bu ham muhim jihatlardan biri. Yana menga faoliyatimni jarohatsiz o'tkazishimda omadim kelgan. SHular tufayli “Milan”da 25 yil o'ynash nasib etdi.

- Hozirgi jamoa o'sha “Milan”ning soyasiga o'xshaydi. Silvio Berluskoni klubdagi 30 yillik boshqaruvini tugatishga tayyorgarlik ko'ryapti va yangi xo'jayinlar bilan klub yana shuhratini tiklashi mumkin. Bunga qanday qaraysiz?

- Klubni sotish vaqti kelgan. Berluskoni jamoaga boshqa pul sarflashni istamayapti. Endi unda “Milan”ga etibor qaratish uchun oldingidek vaqt yo'q. Lekin klub hamisha uning yuragida qoladi, u jamoani juda sevadi. Biroq uni sotiyu yuborishning payti etdi.

Keyingi mavsum oson bo'lmaydi. Navbatdagi xo'jayin kim bo'lishi aniq emas. U klubning necha foizini sotib olishi aniq emas. Mavsum deyarli boshlanmoqda, demak ko'p yangi futbolchilarni kutish kerak emas.

- Vinchenco Montellaning tayinlanuviga qanday qaraysiz?

- U ajoyib futbolchi bo'lgan va Montellaga qarshi o'ynash juda qiyin kechgan. U boshqargan klublar ham ajoyib futbol namoyish qilgan. Ular to'pni yaxshi nazorat qiladi. Ko'ramiz, jamoaga kim keladi va u bilan nima qilish mumkin bo'ladi, ammo Montella “Milan” uchun yaxshi tanlov.

- Siz bilan tengdosh futbolchilarning murabbiylik faoliyati haqida fikringiz qanday?

- Antonio Konte, Karlo Anchelotti, Frank Raykaard – ular tug'ma murabbiy. Hayotni o'zgartirish, o'yinchidan murabbiyga aylanish – katta qadam. Bunga tayyor bo'lish kerak. Konte boshidan bunga tayyor bo'lgan. U futbol tarixini yozadigan yosh murabbiylardan biridir.

Maydonda u hech qachon taslim bo'lmagan va endi o'yinchilardan ham shuni talab qiladi. Italiyada Evro-2016dan oldin muammolar ko'p edi. Bir qator yarim himoyachilar safdan chiqishdi. Lekin Konteni bu tashvishlantirmadi. Umid qilamanki, Antonio “CHelsi”da muvaffaqiyatlarga erishadi. Premer-liga umuman boshqa olam. U dastlab chempionatni tushunib olib, keyin o'yinchilarga ulardan nima xohlashini tushuntirishi kerak. Oson bo'lmaydi, lekin u buning uddasidan chiqadi deb o'ylayman.

- O'g'lingiz Kristian asosiy tarkibdan joy olsa, sizga umrbod topshirilgan 3-raqamli libosda maydonga tushishi mumkin.

- Oxirgi ikki yilda Kristian ko'p o'ynamadi, chunki ikki bor bir tizzasini sindirib oldi. Uning yoshida bunday jarohatlardan so'ng tiklanish og'ir, shuning uchun unga sardorlik bog'ichini ishonib topshirishdi. Bolalarim qanday o'ynayotganini ko'rganimda bundan faxrlanaman.

– Ayni paytda eng kuchli himoyachi kim?

– Tiago Silva. O'tgan yili u juda yaxshi o'ynamadi, lekin terma jamoaga nega chaqirishmaganini bilmayman. Braziliyalik orasida unga teng keladigan himoyachi yo'q. Unda hamma narsa bor: fikrlash, texnika, kuch, havoda o'ynash – eng yaxshi bo'lish uchun barchasi.

– Sizga qarshi o'ynagan eng yaxshi futbolchi kim?

– Diego Maradona. Yana“Inter”da o'ynagan paytda Ronaldo. Unga qarshi o'ynash qiyin edi. chunki u katta, 80 kilogrammdan og'irroq edi, biroq dahshatli darajada tez va texnikali.

– Mashg'ulotlarda eng qiyin raqib kim bo'lgan?

– 1994 yil Ruud Gullit mashg'ulotda o'ng qanotda o'ynagan. Odatda uchrashuvda o'sha erda o'ynamasdi, ammo qarshilik qilish oson kechmagan. Gullit ajoyib futbolchi bo'lgan.

– “Milan” o'yinlarini haligacha tomosha qilasizmi?

– Futbol ko'rishni yoqtiraman. O'zim doim o'ynaganman va shu sababli ishqiboz bo'lmaganman. “Milan”ning muhim uchrashuvlariga tashrif buyurish imkoniyati yuzaga kelsa, bundan juda xursand bo'laman.

– Bilishimiz bo'yicha tennisni yoqtirasiz. Eng yoqtirgan tennischingiz kim?

– Tizzalarim avvalgidek emas, lekin do'stlarim bilan tennis o'ynashni yoqtiraman. Rojer Federerni kuzatish ko'proq yoqadi. Jokovich oxirgi paytlarda yaxshi bo'lsa-da, Federer shunchaki ajoyib.